«Rueda demostrou estar por amais do nivel de Segundo e dará que falar en Primeira»
BANCADA DE RÍO
O excéltico Rai Marchán foi compañeiro do andaluz no Albacete, onde estivo cedido polo Celta o curso pasado; agora, quedará en Vigo
13 jul 2025 . Actualizado á 05:00 h.Javi Rueda está de volta en Vigo para quedarse. Non é habitual que os xogadores que salguen do primeiro equipo como cedidos teñan daquela unha oportunidade co Celta, pero o andaluz goza da confianza do Claudio Giráldez e do club, que ademais, están moi satisfeitos co seu rendemento durante a cesión no Albacete, en Segundo. Aínda segue no parte médico por unha lesión que sufriu aínda durante o préstamo, pero está na recta final da súa recuperación.
O malagueño, de 23 anos, chegou ao club no verán do 2023 procedente do Real Madrid, que o tivera cedido no Murcia o curso anterior. E en Vigo atopouse con Giráldez, clave na súa traxectoria desde ese momento como nas de tantos outros xogadores cos que o porriñés se cruzou. Porque aparte ser fundamental con el naquel filial, xa o fixo debutar en Primeira na última xornada do curso 2023/2024, toda unha declaración de intencións.
Logo, no verán , estivo preto de quedarse, como o propio adestrador comentou nunha entrevista a La Voz este ano, pero ao final, optouse por unha cesión á que sacou todo o proveito posible. Corrobórao o excéltico Rai Marchán, que compartiu vestiario con el no conxunto dirixido por Alberto González. «Fixo unha tempada espectacular connosco. Chegou ao equipo co mercado bastante avanzado e o noso lateral dereito era un dos capitáns, moi bo xogador —en referencia a Álvaro Rodríguez—. Houbo lesións e demais, e por circunstancias, fíxose cun sitio e callou unha gran campaña», valora o catalán.
O propio Rueda tivo tamén problemas físicos ao longo da tempada, pero estando dispoñible, foi practicamente fixo: 2.175 minutos en 31 partidos, 25 como titular e anotando cinco goles. «Connosco, demostrou estar por amais de nivel da categoría, sobre todo, no apartado físico. Creo que é un futbolista que está por amais de Segundo», recalca.
Sen obviar que o salto á máxima categoría é grande, Marchán lembra que «haberá que velo en Primeira», pero á vez, móstrase «convencido de que está preparado, de que o vai a facer moi ben, vai facer un oco e vai dar que falar». Moi pendente do Celta desde o seu paso por Vigo, o novo xogador do Alcorcón —a súa fichaxe anunciouse esta semana— contempla que Rueda terá «moi boa competencia con Sergio Carreira e Óscar Mingueza, teñen a posición moi ben cuberta, pero el vai ter algo que dicir».
Tamén se fixa o seu excompañero en que o feito de que o Celta se clasificase para a Europa League vai xogar a favor do futbolista nado en Alozaina. «Penso que lle vai a beneficiar que o equipo estea en tres competicións, porque todo o mundo vai ter oportunidade de xogar e el vai demostrar que tamén está preparado. Estou seguro» insiste.
Palabras en galego
Javi Rueda converteuse nun xogador moi querido pola afección do Albacete, constata Rai, e tamén polos seus compañeiros. «É un mozo extrovertido, alegre, gústalle gastar moitas bromas, moi andaluz», sinala. E conta que entre os dous houbo unha relación moi próxima «desde o principio». «Falamos moito, de cando en vez dicía palabras galegas, pegáraselle un pouco. Aínda que só estivo un ano, o Celta foi un sitio moi importante para el e no filial fixo unha tempada espectacular que lle permitiu dar o salto ao fútbol profesional», lembra.
Esa tempada tamén foi clave para que Claudio Giráldez decidise que era un xogador para ter en conta. «Ao final, creo que pola súa idade e polo seu momento era importante que saíse e xogase todo o que está a xogar, e que se completase nunha liga na que aínda non xogara», comentou en marzo a La Voz. Engadía que estaba a facer as cousas moi ben e que desexaba que puidese ser unha opción de futuro, como así será.
No club están encantados co rendemento que ofreceu o xogador e teñen moitas esperanzas postas nel para esta tempada. A súa saída, incluso en forma de nova cesión, estivo descartada en todo momento neste mercado.