A céltica, lesionada de longa duración durante a pretemporada do 2024, fala de como viviu esta situación
12 jun 2025 . Actualizado á 12:15 h.A xogadora dAs Celtas Paula González, que tivo o infortunio de lesionarse de gravidade durante a pretemporada e non puido participar co equipo no seu primeiro ano de vida, compartiu cos medios do club como viviu esta dura etapa para ela, rememorando tamén o momento exacto en que se produciu este importante contratempo. «Foi nunha acción en que estaba a defender. O xeonllo fíxome un mal xesto, fóiseme cara a dentro, escoite como me fixo clac, pero non crin que ía ser para tanto. Custoume asimilar que ía estar tanto tempo sen xogar», admite.
A ex de Coruxo, San Miguel e Mos admite que non é doado xestionar unha situación así, e menos, quizais, sendo tan mozo como ela, da xeración do 2004. «Custoume asimilar -insiste- que nunha tempada ilusionante non ía poder estar coas miñas compañeiras en cada adestro e en cada partido. Non é doado, porque son unha xogadora á que lle gusta competir e gañar», engade. No entanto, segue na pelexa para poder conseguilo cando chegue o momento. «Agardo para o próximo ano ter a oportunidade de debutar aquí. Penso todos os días en debutar coAs Celtas, en volver gozar do fútbol e deixar isto atrás, no pasado», sinala.
González, ademais, mostra o seu agradecemento a todos cantos a axudaron a soportar mellor esta situación que lle tocou vivir. «Estou agradecida ás compañeiras, ao corpo técnico, a todas as persoas que me rodean e fanme o proceso máis doado e máis ameno desde o principio», di deixando claro conténtao que está de formar parte dAs Celtas, aínda que tivese que ser doutro modo neste primeiro ano. «Aos que se vexan nunha situación similar, dilles que en principio vai ser duro, pero que non se desencoraxen nin se vingan abaixo, que traballen para volver mellor que antes, con constancia e sacrificio», apunta. A receita que ela aplicou en primeira persoa.