Os xogadores do Celta expresan as súas sensacións tras a clasificación europea
28 may 2025 . Actualizado á 05:00 h.Tras a celebración da clasificación europea, os xogadores do Celta foron protagonizando un goteo de publicacións a través das redes sociais compartindo imaxes do vivido estes días e expresando a súa satisfacción polo que acaban de lograr. O capitán, Iago Aspas, puxo énfase no agradecemento á afección, pero tamén en que cumpriu o prometido en Manchester oito anos atrás. «O 11 de maio do 2017 díxenvos que me deixaría a pel por volver xogar Europa League e aquí tédela. GOZADE. Un abrazo e ala Celta».
O segundo capitán, Iván Villar, pola súa banda, manifestaba: «Fin a unha tempada para o recordo. Orgulloso deste equipo e desta afección, agora e sempre. Fillos dunha paixón». E o terceiro, Fran Beltrán, destacaba que sempre lembrarán esta campaña. «O equipo, a afección, o club, a cidade… unha tempada que non esqueceremos na vida. Que bonito foi celebralo convosco». E Carlos Domínguez coincidía na tempada «inesquecible» e estendíase: «Clasificados para Europa, vivindo momentos máxicos e cunha afección de 10 que nunca fallou. Grazas por facer desta tempada algo espectacular. Somos fillos dunha paixón que non entende de límites. Isto é o Celta. Isto é AFOUTEZA».
Tamén de «inesquecible» cualificaba este curso 2024/2025 Javi Rodríguez, o mesmo que Damián Rodríguez, que prometía «pronto máis e mellor». Diferente é o caso de Alfon González, que non seguirá no club; escribía o albaceteño: «Mereciámolo! Por nós, por como o fixemos e por todos os que nos apoiaron desde o primeiro minuto!! Grazas por este ano». Breves pero emocionante foi a mensaxe de Hugo Sotelo: «A miña cidade, o meu club e os meus amigos. Conseguímolo, volvemos a Europa». Williot Swedberg puña o foco en que o fixeron «xuntos», igual que Hugo Álvarez: «Grazas polo voso apoio; sen vós, non sería posible».
Marcos Alonso, xa a mesma noite do partido, centraba as súas palabras no heroe da clasificación, Iago Aspas: «Tiña que ser el! O ú é a bomba! E este equipo é grande e vós mais!!! Ala Celta!!!». Esa frase de tiña que ser el tamén a usaron outros compañeiros, como Pablo Durán e Fran Beltrán, noutras publicacións. Óscar Mingueza, pola súa banda, dirixíase así á afección: «Que tempada, celtistas! Mereciámonos/Mereciámosnos voltar a Europa!! HalaCelta». E Franco Cervi tiraba de himno do centenario: «Creo que estou namorado».
Yoel Lago celebrou que «o soño se fixo realidade». «Soño cumprido, non hai palabras para agradecervos o apoio que nos dades celtistas, SOÑO CON VOLTAR A EUROPA», expresaba noutra publicación. E Marc Vidal, terceiro porteiro nesta fase final do curso, comentaba: «Esta familia merecíallo, Voltamos a Europa!».