Claudio Giráldez chega á xornada final do campionato sen repetir aliñación
24 may 2025 . Actualizado á 05:00 h.O Celta chega á última xornada da tempada sen repetir once nas 37 datas anteriores do campionato e todo apunta a que o técnico do Porriño volverá facer movementos con respecto á formación que perdeu ante o Raio na penúltima entrega ligueira.
En defensa podería volver Carlos Domínguez no lugar de Yoel Lago para formar un trío defensivo con Javi Rodríguez e Marcos Alonso. No cuarteto do centro do campo, todo indica que Fran Beltrán, Ilaix Moriba e Óscar Mingueza poden ter continuidade polo seu peso no equipo e que Sergio Carreira podería desprazar a Mihailo Ristic, o que á súa vez, tamén carretaría axustes de posicionamento, co vigués na dereita e o catalán na esquerda.
Na fronte de ataque non se pode descartar unha revolución total. Borja Iglesias parece un soldado de luxo para pegarse coas tres centrais do rival e nos flancos poderían aparecer Iago Aspas e Alfon. O capitán non foi titular nas dúas últimas contendas, pero o equipo necesita do seu xogador con máis talento nun día tan sinalado. Se finalmente Claudio Giráldez decide gardalo para a segunda metade, Fer López é o que ten máis posibilidades de ocupar a súa posición. Os célticos teñen claro que sairán a polo partido para intentar darlle un ritmo alto desde o asubío inicial.
