Marcos Alonso non era o último home e o VAR non debeu entrar para recomendar a vermello
BANCADA DE RÍO
González Fuertes sacara amarela ao xogador do Celta ante o Sevilla, pero foi avisado por Trujillo Suárez para revisar a xogada
11 may 2025 . Actualizado á 05:00 h.Pablo González Fuertes, un árbitro cun longo historial sospeito nos partidos que lle pitou ao Celta ata a data, volveu estar no foco fronte ao Sevilla en Balaídos pola súa expulsión a Marcos Alonso. O penalti, por man, ao impactarlle o balón no seu brazo dereito, pode considerarse do todo xusto, pero a vermello está farta de dúbidas.
Porque o colexiado asturiano ensinoulle a cartolina amarela ao central celeste, pero Trujillo Suárez recomendoulle ver a xogada para indicarlle que podería ser motivo de vermello ao interpretar que Marcos era o último home, pero o VAR non pode demostrar que Peque, o dianteiro do Sevilla que golpeou o balón que tocou na man do céltico, ía quedar só nun man a man con Vicente Guaita.
«Non é o último home tal e como fai o control, creo que é demasiado castigo. Pero o regulamento di iso, que se non intervén a cortar a pelota co pé, calquera situación pode ser, aínda que é unha acción gris», comentou despois do partido Claudio Giráldez, que defendeu ao colexiado de quenda indicando que «con Pablo (González Fuertes) dá gusto, porque é un árbitro moi dialogante, que explica as xogadas, que se pode comentar con el».
A vermello foi a decisión máis polémica, pero o asturiano asinou unha arbitraxe en grao sumo sibilino en Balaídos. Non quixo saber nada dunha clara caída de Javi Rodríguez na área rival e o seu criterio nas faltas non foi nada coherente. Ao final, co 3-2 no marcador, a súa actuación quedou nun segundo plano.
