Fredi Álvarez: «O valor máis grande para un técnico é que nunca houbo dúbidas do club»

O Celta Fortuna vive un ano complexo co seu proxecto da aceleración de procesos, e dúas semanas atrás tocou fondo, caendo en descenso en Primeira RFEF. Nos peores momentos, o club mantivo a súa confianza na idea de Marco Garcés, o director de fútbol, e en Fredi Álvarez Paredes (Moaña, 1976) como adestrador para liderar o equipo filial. Hoxe, o equipo respira fóra da zona vermella logo de gañar dous partidos a domicilio, e o técnico incide en que a idea é a correcta e que o equipo, logo dun punto de inflexión, está no camiño correcto. Tamén se amosa encantado de perder a Fer López, pois di que un filial está para impulsar xogadores ao primeiro equipo.

—Como se ve a situación logo destas dúas vitorias?

—Doutro xeito, sobre todo porque fomos capaces de cambiar a dinámica do inicio da segunda parte da liga. Arrancamos con resultados nada positivos, metémonos na zona de descenso e estes resultados acadados cambian a dinámica e o equipo colle confianza. Houbo un punto de inflexión tras sumar seis puntos en dúas saídas, pero queda moito e está todo moi axustado.

—Pasaron de non gañar dous partidos na casa ante rivais directos a sumar seis puntos fóra en dúas saídas con equipos de arriba.

—Na casa sabiamos que eramos un equipo forte, e igual foi exceso de confianza. Temos un equipo moi novo e, ás veces, a inconsciencia fai que penses que podían ser partidos doados co Sestao e o Lugo, pero, logo deses reveses, entendemos que nesta categoría, e máis a estas alturas da tempada, non hai ningún partido fácil. O equipo meteuse nun escenario complicado, pero aceptou o reto de pelexar dunha vez por todas por esa permanencia.

—Houbo algún momento de dúbida coa aceleración de procesos?

—Pola miña parte, non, e, pola do club, creo que tampouco. Nestas últimas semanas, igual dende fóra se viu doutra maneira e podían pensar que o proxecto era equivocado, pero, dende dentro, en todo momento eramos conscientes de que a tempada ía ser complexa e difícil. Dende o club, o proxecto está claro: a idea é expoñer a xente nova canto antes mellor, sabemos que é un proceso complexo nunha categoría difícil, pero o máis importante é que dentro do club nunca se dubidou, senón que se apostou por este proxecto. Dende dentro, sempre houbo confianza neste proxecto.

—Supoño que vostede era moi consciente do ano que lle esperaba.

—Por suposto. Cando falaron comigo a principios de tempada de cal era a idea do club, eramos conscientes. Este equipo sufriu unha transformación moi agresiva, fóronse 14 xogadores, tres cuartos do grupo, e deuse paso a xente moi nova que aínda está en idade xuvenil. Sabiamos que ía ser un ano complicado, pero en todo momento o club apostou e defendeu isto. Sabemos que os xogadores novos teñen altibaixos, houbo momentos da tempada en que fixemos grandes partidos, e, nos momentos en que non o fixemos tan ben, fomos capaces de estar tranquilos, ter a cabeza fría e seguir traballando, e agora, estar en disposición de conseguir o obxectivo de manter a categoría.

—Sería un paso atrás neste proceso formativo un hipotético descenso?

—Agardemos que iso non suceda, non está na nosa mente. Se sería un paso atrás? Se buscamos promover xogadores e adiantar procesos, canto máis arriba, mellor. Un descenso non agrada a ninguén e sería un paso atrás, pero imos traballar por facer mellores estes xogadores e facer os puntos necesarios para manter a categoría e enfocar os vindeiros anos co proxecto que Marco Garcés trouxo a este club.

—Garcés pechou filas con vostede dun xeito rotundo, un detalle a ter en conta, supoño.

—En todo momento me sentín arroupado por parte do club. Cando os resultados non acompañan, dende fóra se poden dicir moitas cousas, non obstante, dende o club me transmitiron tranquilidade. Estou moi agradecido, porque en ningún momento se xerou ningún tipo de dúbidas e penso que iso é o valor máis grande que pode ter un adestrador.

—Ten máis risco verse con estes rapaces nunha situación complexa?

—Sen dúbida, pero temos un grupo de xogadores cun pouco máis de experiencia, os de 21 e 22 anos, que son capaces de entender a situación e axudan moito a eses xogadores máis novos. Eles son un valor importante e nos están axudando moito nesta situación.

«O obxectivo que temos é perder a Fer e outros xogadores»

O Celta Fortuna quedou no mes de decembro sen Fer López, o seu xogador máis diferencial. Fredi non esconde que é unha baixa importante, pero sabe que o seu cometido é perder o media punta e outros. Tamén defendeu o proceso de Jones, e puntualiza que non hai perda de confianza en Marc Vidal.

—Cando lle quitan a Fer López é unha boa nova, pero perdeu un dos seus puntais.

—Perder a Fer, para calquera equipo, é unha baixa importante, pero o obxectivo que temos é perder a Fer e oxalá perdésemos outros xogadores polo camiño, porque iso significaría que o traballo se está facendo ben, que os xogadores van medrando e petando na porta do primeiro equipo. Fer é un xogador que ten a cabeza ben amoblada, sabe que é un xogador do filial e, cando necesitemos tirar del, el estará.

—O caso de Jones é complicado, porque apenas traballa co filial e, cando baixa a xogar, vénselle as costuras.

—É un caso especial. É un xogador de 18 anos que chega dun fútbol moi diferente ao noso, ten un potencial tremendo e foi fichado porque había moitos equipos importantes de Europa tamén interesados, e sabemos que se lle fai ficha do B porque hai un proceso de adaptación. Xa sabiamos que ía ser difícil pola súa xuventude, polo cambio de cultura e porque os adestramentos son moi diferentes. Non adestrar con nós vaille dificultar algo máis todo, porque hai xogadores aos que non coñece e a fútbol xogan once que se teñen que coñecer, e non é doado, pero no club temos moitas esperanzas postas nel porque ten un potencial grande. Esta tempada será difícil sacarlle un rendemento alto, pero imos intentalo e esperemos que canto antes vexamos a súa mellor versión.

—A que obedece o cambio na portería? Houbo perda de confianza en Marc Vidal?

—Nós temos tres bos porteiros. Que xogase Marc ata hai dúas semanas non quere dicir que non confiásemos en Coke e en César, e que agora xogue Coke non quere dicir que perdésemos a confianza en Marc Vidal.

«Moitos futbolistas nunca viviron esta situación, pero aceptaron o reto e a resposta é boa»

O Celta Fortuna, con catro puntos de marxe, afronta a recta final de liga cun calendario cheo de rivais directos, un deles, o Barcelona B, que vive un proceso de formación moi semellante ao dos celestes.

—Teñen un calendario cheo de duelos directos, iso é positivo?

—Nunca o sabes, todos os partidos son difíciles. Xogar con rivais de arriba ou de abaixo a estas alturas non quere dicir nada. Os partidos van ser todos complicados. Estas últimas xornadas van ser moi duras e difíciles, con partidos complexos.

—Ve o equipo preparado para a recta final?

—Na xornada 28 estabamos en descenso e, a partir de aí, centramos o obxectivo. O equipo aceptou o reto e todos o temos máis claro. Moitos destes xogadores nunca pelexaron por non descender na súa vida, e están vivindo unha experiencia nova que debemos aceptar. O equipo respondeu ben.

—Como ve o partido co Barcelona Atlètic, que vive un proceso parecido ao que vive o Fortuna?

—É outro equipo que tivo unha transformación moi grande. Eles foron terceiros o ano pasado, e nós, cuartos, e estamos pasando os dous pola mesma transformación, con moito xogador novo no once inicial, cunha proposta similar á dos últimos anos, e aí se ven os cambios de ciclo. Estamos na mesma situación, aínda que eles cambiaron de adestrador hai cinco xornadas. É un equipo que empata moito para ser filial e vén de gañar á Cultural.

—Teñen que recuperar o músculo na casa.

—Esa é a nosa idea, na casa temos que estar cómodos e gañar partidos. Temos un reto importante, que é gañar tres partidos seguidos esta tempada. Queremos volver demostrar que Balaídos é un campo difícil para sacar puntos.

---

---

---