O equipo vigués non sumou de tres en ningún dos duelos nos que o catalán non estivo
02 abr 2025 . Actualizado á 05:00 h.Durante moito tempo, o Celta tivo Aspasdependencia e cada vez que faltaban o moañés, os vigueses eran incapaces de gañar. Esta situación repítese agora con Óscar Mingueza, pois o luns cumpriu o seu partido de sanción ante o As Palmas e o equipo foi incapaz de gañar, prolongando a súa serie negativa sen o catalán no campo. Para o sábado, en Son Moix, os celestes recuperan ao internacional.
Xa son sete os partidos nos que o Celta non logrou imporse no marcador sen Mingueza no campo. O exfutbolista do Barcelona perdeuse este curso catro partidos, un por lesión, ante o Atlético de Madrid, e tres por sanción. Neses catro duelos, o Celta só sumou dous puntos tras perder cos de Simeone e o Valencia e empatar con Alavés e As Palmas.
Os outros tres encontros nos que Mingueza non empezou como titular foron os dous contra o Athletic (3-1 en San Mamés e 1-2 en Balaídos) e fronte ao Atlético (1-1) no Metropolitano. En total, no que vai de tempada, o defensor foi titular en 25 partidos de Liga, achegando cinco asistencias e marcando tres goles, o último, ante o Leganés a principios de marzo.
O seu sitio ante o cadro de Diego Martínez foi ocupado na primeira metade por Ristic, que evidenciou a súa falta de continuidade, e por Marcos Alonso no segundo acto, pero quedou claro que o madrileño é un xogador capitán como central zurdo para que a defensa céltica poida manter o equilibrio. Todo apunta a que o de Santa Perpetua regresará á titularidade en Mallorca.
Co futbolista formado no Barcelona o Celta ten pendente unha negociación para ampliar o contrato que expira o 30 de xuño do 2026, o que significa está a piques de entrar no seu último ano.
Hugo Álvarez, sen minutos
Quen parece non recuperarse do todo é Hugo Álvarez, que non gozou de minutos ante o As Palmas, aínda que o contexto era favorable para que puidese saltar ao campo. Non xoga desde o 8 de febreiro, cando foi titular ante o Betis e lesionouse. Desde entón, pasaron dous meses e segue parado, aínda que entrou en varias convocatorias nas últimas xornadas.