O defensa do Celta tivo que retirarse lesionado do primeiro amigable de pretemporada, ante o Benfica
14 jul 2024 . Actualizado á 08:44 h.O defensa do Celta MIhailo Ristic tivo que retirarse lesionado cando só transcorreran oito minutos do primeiro amigable de pretemporada dos vigueses, ante un dos exequipos do serbio, o Benfica. Á conclusión do partido, o club celeste informou de que o xogador padece unha escordadura de nocello esquerdo.
Trátase do primeiro lesionado do verán, porque aínda que Vicente Guaita e Tadeo Allende non se desprazaron a Portugal polo seu estado físico, en ambos os casos as ausencias debéronse a molestias típicas destas alturas do ano que non revisten importancia. No caso de Ristic, a cuestión vai máis aló e haberá que ver cando volve estar dispoñible.
Ristic, que hai un ano enfrontábase ao Celta como parte do conxunto luso antes de ser fichado para o cadro que entón dirixía Benítez, sufriu multitude de lesións ao longo da súa primeira campaña en Vigo. De, feito, acabou sendo máis o tempo que non estivo dispoñible que o que si o estivo.
O futbolista, que asinou co Celta ata xuño do 2026, disputou en liga na súa primeira tempada só 807 minutos repartidos en doce encontros, nove como titular e tres completos. Agora, a pretemporada non empeza da mellor forma para el.