O xogador do Celta e a súa parella, que anunciara o embarazo en outubro, convertéronse en pais
22 abr 2024 . Actualizado á 22:27 h.O central do Celta Unai Núñez e a súa parella, a andaluza Cintya Roldán, acaban de converterse en pais por primeira vez dunha nena á que chamaron Gara. O club vigués foi o que anunciou a boa noticia a través das redes sociais despois de que no mes de outubro fixesen público o embarazo do mozo. «A familia celtista segue crecendo! Moitas felicidades a Unai e a Cintya polo recente nacemento da pequena Gara. Zorionak, familia!», escribiron a través das redes sociais. Logo, os felices papás tamén fixeron partícipes aos seus seguidores do nacemento cunha imaxe dos tres no hospital Álvaro Cunqueiro.
A parella de Unai estivo presente en Balaídos no partido do sábado fronte ao As Palmas, no que Núñez foi titular e completou os 90 minutos. Menos de dous días despois, a parella xa ten con eles á nova integrante da familia. Ademais, a chegada da pequena coincidiu cos días libres dos que goza o equipo domingo e luns. Será este martes cando comecen a preparar a contenda fronte ao Alavés.
«O momento máis feliz das nosas vidas. Papá e eu agardámoste» escribía a recente mamá o pasado mes de outubro para compartir cos seus seguidores que un bebé benía en camiño. A publicación constaba de varias imaxes súas, entre elas, as do xogador vasco entregando un ramo de flores á súa noiva onde se indicaba xa que o que agardaban era unha nena, del bicando a tripa da súa compañeira e tamén ecografías da pequena que vén en camiño.
Os pais máis recentes ata o de agora no cadro de persoal do Celta eran Fran Beltrán, cuxa filla acaba de cumprir un ano, e Óscar Mingueza, cuxa pequena veu ao mundo en xullo do 2023. Ademais, Jailson tamén será pai proximamente, no seu caso, por segunda vez, xunto á súa compañeira Simone Pohl.