O central do Celta móstrase «máis que orgulloso» do equipo tras o triunfo en Sevilla
18 mar 2024 . Actualizado á 05:00 h.Unai Núñez non tivo o seu día no Sánchez Pizjuán fronte ao Sevilla e o central do Celta é o primeiro que o sabe. Un erro seu custou o gol que adiantaba aos hispalenses e non foi o único fallo importante que cometeu no partido. Por iso, á conclusión do mesmo, á parte de expresar a súa alegría polo triunfo, quixo entoar o mea culpa publicamente a través das redes sociais.
«No persoal, un partido para esquecer», recoñecía o vasco, querendo tamén sacar o lado positivo, que é que esta mala actuación vai servir como estímulo para tratar de recuperar o seu nivel. «Unha motivación máis para seguir traballando e ofrecer a mellor versión!», sinalaba xunto con varias imaxes do duelo. Antes diso, celebraba o triunfo: «Máis que orgulloso deste equipo. Partidazo de todos! +3 puntos moi importantes que nos levamos para casa».
Á conclusión do partido, Núñez recibía o apoio en forma de abrazo do capitán do equipo vigués, Iago Aspas. Logo, a súa publicación admitindo a súa mala actuación foi respondida con mostras de cariño por parte de compañeiros como Larsen, Miguel Rodríguez ou Jailson, así como de multitude de celtistas que lle lembraron que «non somos máquinas» ou que virán días mellores».
