O técnico do Celta, que pide unidade e paciencia, mantén todo o apoio da cúpula pero xoga recuperar o crédito da bancada ante o Xirona
28 ene 2024 . Actualizado á 05:00 h.Rafa Benítez conta con todo o crédito do club, pero ten dividido ao celtismo. Aínda que os resultados de principios de ano daban unha tregua nos últimos tempos, as dúas derrotas ante a Real Sociedade, polo xeito de producirse, levantaron de novo as dúbidas. O partido ante o Xirona será un bo termómetro para ver a capacidade de recuperación do conxunto celeste. O adestrador do Celta fai un canto á unidade fronte ás críticas. «Ou estamos unidos, centrados e non perdemos enerxía con cuestións de adestrador, xogadores ou fichaxes, ou vainos a custar. Unidos somos máis fortes, demostrouno o club no pasado», comentou na antesala de recibir ao Xirona.
Porque esta sobremesa, cinco días despois, volverá a Balaídos, de onde saíu o pasado martes en Copa con música de vento. Non por ser o único conxunto que actuaba como local que quedou fóra de semifinais, senón polo xeito de perder. Benítez di que nos partidos está centrado no seu e xustificou as dúas derrotas polo diferente potencial entre os dous equipos. «A miña análise como profesional é que xogamos contra un dos mellores de Europa, que ten persoal para rotar seis futbolistas dun partido a outro en tres días, un ritmo de competición moi alto;ademais, métennos un gol no minuto 1, é dos que máis faltas fai, co que te para, e dos que máis recupera en campo contrario xunto co Athletic, polo que non che deixa saír», dixo da Real.
O mellor xeito de pasar páxina e de que Benítez recupere o crédito, que ten intacto na cúpula directiva, é un bo desempeño ante o Xirona, un líder que aínda non coñece a derrota a domicilio na liga aínda que na Copa vén de caer en Son Moix. «Ti es líder por méritos propios, teñen moito desequilibrio por fóra, son bos ao contraataque, teñen un dianteiro poderoso que lles permite moitos centros e remates, manexan. Teñen moitas cousas que fan ben, colleron unha dinámica positiva».
Na primeira volta, os célticos competíronlle ben ao Xirona e incluso estiveron preto de gañarlle se Jaime Latre non o impide desde o VAR. «Dá rabia porque o tivemos na man (o triunfo) e escapounos á falta de cinco minutos por circunstancias». E máis aló do ruído de sabres, el segue co seu particular maratón, aínda que sen definir o tipo de paso. «A mensaxe é claro. Isto unha maratón. Roma non se construíu nun día, temos que seguir construíndo. Creo que o Celta está a crecer. Estamos en posición que non nos gustaría pero sabemos moitas cousas que pasaron na primeira volta», precisou. «As cousas (no club) están a facerse ben, debemos ter paciencia». Moita.