O técnico do Celta, que non poderá contar con Starfelt, di que a única posibilidade de saída a día de hoxe é Marchesín
02 ene 2024 . Actualizado á 11:30 h.O adestrador do Celta, Rafa Benítez, valorou positivamente a incorporación de Jailson, o primeiro reforzo invernal do equipo vigués. «É positivo. O club moveuse rápido, é unha fichaxe na liña do perfil (que necesitaban). Buscabamos un centrocampista con certa estrutura física, que puidese disputar, que fose seguro con balón», sinalando, ademais, que era unha oportunidade de mercado e que pode achegar experiencia e calidade, á parte de que o xogador e o técnico coñécense. «Aínda que non fose titular en Palmeiras, é coma se fichas a un suplente o Bayen e dis que non era titular».
Aínda que necesita un período de adaptación a nivel físico, non descartar que debute se é necesario. «Se hai que botalo ao campo, podemos facelo, outra cousa é cando poida entrar e canto tempo poida xogar», sinala. Lembra que estaba de vacacións e por iso é polo que necesite unha posta a punto física, aínda que «non está a lume de biqueira». O importante, sostén, é que xa teñen un «perfil diisinto que pode achegar outras cousas». Considera que é compatible con Renato Tapia, que ambos teñen traballo, calidade para manexar. Aínda que chega como mediocentro, o técnico ten presente que tamén pode exercer de central.
Preguntado por pola desvinculación do asesor deportivo externo ata decembro, Luís Campos, asegurou que non o agardaba. «Cando os resultados van mal, apúntase ao adestrador. Nós temos que traballar ombro con ombro e que o que chegue teña o maior apoio posible e que acertemos todos o máis que podamos», en referencia a Marco Garcés, con quen xa tivo contacto. «Tiña referencias súas. É un home activo, con ganas, con ideas interesantes, coñece ao persoal. A partir de aí, o día a día dáche detalles e matices da liña en que tes que ir». Neste sentido, a Jailson cualifícao como «unha fichaxe de club». Mencionou, así mesmo, que segue tendo contacto diario con Juan Carlos Calero.
No relativo ás saídas, asegura que non están «a pensar en deixar saír xente» cando non están «sobrados de nada». A única posibilidade a día de hoxe é a marcha de Agustín Marchesín, para o que tivo palabras de eloxio, do mesmo xeito que para Iván Villar, que está «fenomenal» e co que conta «ao 100% para o futuro do Celta». Polo demais, apunta que deben estar abertos ao mercado, aínda que este é «moi difícil, hai menos xogadores dispoñibles que estean sans e ben, porque eses están a xogar nos seus equipos e non chos van a deixar», parte de que a Copa África implica outros xogadores aos que non merece a pena fichar ao non poder contar con eles agora. «Non temos este obxectivo ou o outro, estamos a mirar. O medioncentro era unha prioridade e cubrímolo pronto, o cal é unha vantaxe».
Benítez ten presente que «tes que ser mellor que tres (para evitar o descenso) e para iso a experiencia é fundamental». Pensaban que as cousas ían ser diferentes, pero lembra que nos últimos anos o Celta salvouse do descenso «dependendo ao 100 de Iago Aspas» en seis dos últimos anos. «Cada partido, para nós, é o máis importante e hai que ir vendo como o equipo sobe e mellora, non pornos ansiosos; así, equivocámonos». Recalca que son o cuarto equipo que máis tira, pero o problema é que necesitan meter gol.
Para o partido ante o Betis, está descartado Carl Starfelt, mentres que Mihailo Ristic chega «moi ao límite» e dependerá de como se atope no adestramento deste martes. Do rival opina que «está a ser competitivo. Son un equipo ordenado que non está a facer moitos goles e está a encaixar pouco. Están nese momento de equilibrio que permite conseguir puntos. Son perigosos e á contra poden facer dano». «Temos que ir a cada disputa para gañala, hai que ir a polo partido», proclama. Matiene que a liga é unha maratón e é clave «seguir traballando forte, con implicación dos xogadores».