O partido de Copa fronte ao Sestao supón para o central do Celta xogar no seu pobo e reencontrarse con varios excompañeros e amigos
06 dic 2023 . Actualizado á 05:00 h.Unai Núñez concedeu unha extensa entrevista ao Sestao River, rival do Celta en Copa e equipo do seu pobo, na que fixo referencia aos seus dous amigos nas filas deste club, Gorka Garai e Álvaro Mateo. «A mañá anterior ao sorteo, enviara unha mensaxe a Gorka dicindo que a ver se chegaba para ir velos contra o Fuenlabrada. Despois de adestrar, as primeiras mensaxes eran seu e de Álvaro dicindo que xa nos iamos a ver, que nos tocara en Copa», conta.
Destaca a boa relación que ten con ambos. «Non sei cantos anos cheguei a xogar, pero desde alevíns ao Baskonia, todos os anos. Crecemos xuntos e son dos xogadores cos que máis relación tiven dos meus anos en Lezama», detalla. Tamén sinala que manteñen o contacto por WhatsApp e que sempre que vai a Sestao, procura achegarse ás Chairas e «charlar con eles o tempo que teña».
Ao ser do pobo, recalca que ten un gran cariño cara ao club, onde lle gustaría colgar as botas chegado o momento. «Podían tocar equipos de moitos sitios e xa que estaba o Sestao, dixen que me gustaría xogar aquí. Tiven unha sorte incrible. Vai ser especial xogar na casa, con familia e amigos», di. Á parte de que xa lle ocorreu algo similar co Gernika o curso pasado. Tamén menciona que á afección do Celta gústanlle as viaxes ao País Vasco.
A súa mellor decisión
Unai tamén fala da decisión que tomou no seu día de fichar polo Celta en busca de minutos. «É difícil saír do club da túa vida, pero pensando na miña carreira, necesitaba continuidade», lembra. Pasado o tempo, considera que foi «unha das mellores decisións» que tomou na súa vida. Di estar contento en Vigo e non ter tope. «Fun de menos a máis e quero seguir mellorando».