O central reencóntrase co seu equipo de formación por segunda vez en San Mamés
31 oct 2023 . Actualizado á 07:46 h.Unai Núñez vive a súa segunda tempada de cesión no Celta por parte do Athletic Club, a definitiva, porque ao 30 de xuño do 2024, o club vigués ten a obrigatoriedade de compralo salvo que o conxunto bilbaíno decida recuperalo, opción que só poderá exercer nesa data. O prezo de compra para os celestes é de oito millóns de euros.
A oito meses vista dese día, Unai Núñez volve á súa casa convertido no futbolista do Celta máis utilizado na liga con 1.080 minutos. O de Portugalete foi titular en todos os partidos e apenas se perdeu un par de minutos da prolongación na visita ao Barcelona, de feito foi o único encontro que non completou ata a data. Ademais, Rafa Benítez tamén tirou del no partido da Copa en Turégano.
Os seus números están acordes co protagonismo que exhibiu o canteirán do Athletic a tempada pasada, cando tivo participación en 36 partido de liga, todos menos un como titular. A súa participación en Vigo nada ten que ver cos días duros que lle empurraron a saír do Athletic no verán do 2022. Na súa última tempada en Bilbao, con Marcelino de adestrador, só disputou nove partidos de liga, sete deles saíndo de inicio. O seu cambio en Vigo, en canto a protagonismo, foi radical.
Curiosamente, no Athletic abríronlle a porta de saída nunha época de proliferación de centrais, pero coa saída de Íñigo Martínez ao Barcelona, as tentativas de regreso erradas con Laporte e as lesións de Yeray Álvarez, operado do recto anterior, e Aitor Paredes, que arrastraba unha lumbalxia, a Valverde non lle quedou máis remedio que tirar con Dani Vivian e reconverter aos mediocentros Nolaskoain e Beñat Prados.
Esta noite agarda a Unai unha difícil tarefa, xa que terá que verllas con Guruzeta, o dianteiro de referencia de Valverde, e auxiliar a Manu Sánchez na banda esquerda pola que intentará sorprender, en modo gacela, Iñaki Williams, o máximo realizador dos branquivermellos.
