O defensa non entra nos plans do Celta e apunta a unha cesión en Segundo
20 ago 2023 . Actualizado á 08:10 h.O defensa do Celta José Fontán apunta ao Cartaxena, onde coincidiría, de confirmarse a información avanzada este sábado por Ángel García, co tamén canteirán celeste Lautaro de León, a préstamo no equipo murciano. Será a segunda cesión consecutiva do vilagarcián, que o curso pasado xogou no Go Ahead Eagles.
O canteirán vivirá, deste xeito, a súa primeira experiencia na segunda categoría do fútbol español. Ata o momento, leva 23 encontros e 929 minutos en Primeira, onde debutou da man de Óscar García Junyent o 1 de outubro do 2020, sendo titular fronte ao Barcelona, pero tendo que retirarse por lesión á media hora; esa tempada acabou con 14 encontros e á seguinte, xa con ficha do primeiro equipo, con nove. O seu último duelo co filial data de marzo do 2020.
A pasada campaña, na Eredivisie, sumou 1.103 minutos en 21 encontros; aínda que comezou como titular, viuse lastrado por unha lesión e custoulle retornar ao equipo inicial. De volta en Vigo, non entrou nos plans de Rafa Benítez, mesma situación que Sergio Carreira e Miguel Baeza; ningún dos tres entrou nas convocatorias de Liga e os dous últimos, tampouco nos amigables inmediatamente anteriores ao comezo da tempada. Fontán si estivo ante o Compostela.