O atacante do Celta, que confirma que gañou masa muscular, ve o equipo «no bo camiño»
06 ago 2023 . Actualizado á 08:57 h.O xogador do Celta Williot Swedberg ofreceu as súas impresións aos medios do club despois do triunfo sobre o Wolfsburgo no cuarto e penúltimo amigable do equipo previo ao comezo do campionato de liga. «Creo que fixemos un bo partido ante un contrario difícil que é un rival alto na Bundesliga», introduciu. Considera que manexaron ben e puideron gañar, polo que queda cunha sensación positiva.
No persoal, confirmou que subiu masa muscular -catro quilos- e admitiu que agora se ve «mellor fisicamente». Lembrou que tivo pouco protagonismo a tempada pasada, no seu primeiro ano no club -foi unha aposta de Luís Campos no verán do 2022-, polo que na súa cabeza está «aproveitar todo» o que xogue.
En canto ao balance global do que vai de pretemporada no colectivo, dixo que xogaron ben e que os resultados tamén acompañaron, o que non significa que non quede marxe para seguir crecendo e aproximándose ao que lles pide Rafa Benítez: «Sempre se pode mellorar, pero estamos no bo camiño», concluíu.