Un dato ofrecido no documental sobre a historia do club vigués estreado esta semana ofendeu ao andaluz
26 feb 2023 . Actualizado á 08:50 h.O Celta estreaba este xoves un documental sobre a súa historia con motivo do centenario que levantou bochas entre a afección do Recreativo de Huelva, malestar que foi reflectido a través do perfil oficial de Twitter do propio club. «A cidade de Vigo é o berce do fútbol en España. Os primeiros partidos documentados deste deporte celebráronse en 1876, no Malecón, actual praza de Compostela», comeza o vídeo.
As reaccións por parte de seguidores do conxunto de Huelva non se fixeron agardar e, tras elas, o propio club deu o paso de dirixirse publicamente ao Celta para mostrar o seu malestar. «Queridos amigos do Celta, felicidades polo voso centenario. Desde o Decano do fútbol español e desde a provincia BERCE DO FÚTBOL EN ESPAÑA, na que, desde 1873, e de xeito perfectamente documentado, xogaba ao fútbol en Minas de Riotinto. Respectemos a Historia», espetaban.
O club vigués replicaba a través da conta especial específica creada para o centenario -aínda que o Recre mencionaba o chío do documental do perfil principal da entidade-. «Amigos do Recre, sen o máis mínimo ánimo de polemizar: o vídeo está baseado nas conclusións de diversos investigadores e documentos xornalísticos, pero, en calquera caso, sempre teredes o noso admiración e cariño como decanos».
Os chíos dos clubs, e os doutras persoas que afearan o dato que ofrece o vídeo de Academia Play, derivaron en discusións entre afeccionados dos dous equipos dando os seus argumentos sobre cales son a data e o lugar correctos.
