O adestrador da Real Sociedade destacou a importancia do triunfo do seu equipo fronte ao Celta
16 oct 2022 . Actualizado á 19:32 h.O adestrador da Real Sociedade, Imanol Alguacil, destacou a importancia do triunfo logrado en Balaídos nun partido «moi complicado» ante o Celta que se definiu por «pequenos detalles» e por iso pediu «humildade» ao seu equipo para seguir nesta liña ascendente. «Temos que ter humildade e pensar que non fixemos nada. Agora só temos a mente posta no partido contra o Mallorca, non cambiamos. Sempre pensamos no próximo partido. O segredo está en non virse arriba, seguir cos pés no chan», declarou en rolda de prensa.
O técnico vasco dixo que «o fútbol é acertos e erros», por iso defínese por «pequenos detalles». «Se o Celta non está máis arriba é por eses pequenos detalles, eses pequenos detalles que a nós ultimamente estannos saíndo de cara porque intentamos que haxa máis cousas positivas no xogo. Era un partido moi complicado e sacámolo adiante», subliñou.
Imanol foi preguntado por Brais Méndez, para o que tivo palabras de eloxio. «Vós coñecédelo mellor, é un xogador top, está rodeado de xogadores top e o que nos está dando é bestial», dixo. Foi máis aló do futbolístico, expresándose na mesma liña que o fixera Eduardo Coudet na previa ao destacar a súa faceta humana máis aló da deportiva. «Eu non o coñecía e é unha belísima persoa, adaptouse de marabilla. É un lujazo telo polo deportivo e o persoal».
Ademais, Imanol alegrouse especialmente por Illarramendi, que marcou despois de catro anos: «A súa alegría, a miña, a do equipo, a de todos... Porque foi exemplar o seu comportamento durante todo este tempo, primeiro cando estivo lesionado e agora cando está a xogar menos». Optou por el a pesar de que Mikel Merino, con molestias nos últimos días, tiña o ok dos servizos médicos para participar e inicio. O técnico realista non quixo arriscar, pero acabou dándolle minutos na segunda parte.
