Joselu, o ariete que máis balóns gaña por arriba do fútbol continental, pon a proba o xogo aéreo dun cadro vigués que pode perder ao seu defensa máis alto
31 mar 2021 . Actualizado á 05:00 h.O excéltico Joselu Mato (Stuttgart, 1990), o xogador que máis balóns gaña por alto, será a principal ameaza do Celta nunha partido clave. O de Silleda presenta unha estatística de 293 balóns por alto gandos no que vai de campionato, unha cifra que ninguén acada nas cinco grandes ligas do vello continente. Un aviso do seu potencial que se ve agravado pola perda de centímetros da zaga do Celta se finalmente Néstor Araujo, pendente de probas, non pode disputar o partido. Para Coudet significaría perder 188 centímetros, o que deixaría a Tapia (1,85) como o teito do sistema defensivo celeste, pero cun déficit de sete centímetros co 1,92 de Joselu.
O que fose dianteiro céltico na súa etapa de formación, e con protagonismo no Celta de Eusebio en Segunda División, é a referencia ofensiva absoluta do Alavés, que lle busca dun modo insistente cos centros laterais e coas xogadas de estratexia. O silledense leva polo momento sete goles, aínda que só un deles foi de cabeza, (En-Nesyri é o máis certeiro, con cinco). No colectivo, os babazorros conseguiron catro goles de cabeza, tres menos que o Celta (7), con Santi Mina e Brais Méndez, encabezando o ránking con dous cada un.
Pero máis aló da súa efectividade no remate coa testa, destaca o traballo que fai para o colectivo á hora de xerar situacións de perigo. É un especialista en prolongar balóns para xerar espazos e a defensa do Celta debe estar moi atenta a todos os lances e debe intentar reducir ao máximo os centros laterais, as faltas próximas á área e os córneres (os vascos acumulan 90 a favor e 152 en contra fronte aos 91 lanzados polo Celta e os 120 concedidos). Ademais de Joselu, Abelardo tamén pode tirar dos 189 centímetros de Lejeune e o 1,88 de Ely.
O Celta terá que defenderse probablemente sen o 1,88 de Araujo, quedando Murillo como central máis alto con 1,82, dous centímetros máis que Joseph Aidoo, que goza pola contra dun potente salto.
As clases da Bundesliga
Joselu, que gaña unha media de 7,3 duelos aéreos por partido, considera a Bundesliga a súa auténtica escola no mundo do fútbol. O ariete converteuse na referencia absoluta do Alavés nas dúas últimas tempadas, nas que rendeu a un bo nivel. O curso pasado rematou con once goles, o seu mellor rexistro en Primeira, e esta campaña está en disposición de repetir, xa que suma sete con dez xornadas por diante. Esta tempada é o segundo xogador do Alavés máis utilizado con 2.223 minutos no campo nun total de 25 partidos.
Ata a data enfrontouse ao Celta en catro ocasiones, unha co Deportivo e tres co Alavés, cun triunfo (en Mendizorroza na campaña pasada) e tres derrotas, sen chegar a marcar en ningunha das citas. O domingo terá unha nova reválida como dianteiro máis avanzado do equipo de Abelardo e porá a proba a capacidade defensiva e o paso adiante do Celta nos centros laterais, un dos aspectos do xogo onde máis lles custa mellorar aos vigueses. Unha ameaza en grao sumo seria.
