Tramitaranse novas altas sen cota de entrada
13 novs 2020 . Actualizado ás 10:27 h.O Celta lanzou esta mañá a súa campaña de abonados 2020/2021. Ante a imposibilidade de acceder a Balaídos, o club vigués establece un prezo de 50 euros para manter a antigüidade, a butaca e, en caso de ser posible, ter acceso nun momento dado a entradas cando se permita entrar aos campos de fútbol de Primeira.
«Nos bos e malos momentos, na bancada de Abanca Balaídos e na distancia, na gloria e a amargura. Sempre Celta », comeza o club o texto co que explica a continuación os detalles da campaña. «As circunstancias actuais e a súa previsible proxección no tempo levaron ao RC Celta a buscar solucións diferentes e, sobre todo, beneficiosas para os seus abonados de cara á tempada 2020/2021. Ante a incerteza sobre o desenvolvemento da presente tempada, o club lanza unha campaña de abonados especial», prosegue a introdución.
A continuación detallan que ofrecen aos seus abonados a posibilidade de renovar o seu carné «por tan só 50 euros, mantendo todas as vantaxes asociadas á súa condición». Tramitaranse, así mesmo, novas altas que non terán cota de entrada e «coas mesmas vantaxes que as renovacións en canto a descontos e acceso a entradas se fose posible». Os trámites poden realizarse desde hoxe ata o 31 de decembro.
Entre os beneficios que menciona o club están a asistencia a partidos do Celta , do Celta B e do Celta de baloncesto, aínda que os tres equipos veñen competindo ata agora sen público. Tamén reflicten o 30 % de desconto na tenda e o acceso a contidos exclusivos nun apartado da web recentemente habilitado no que é necesario o rexistro e a cesión de datos persoais.
As renovacións e altas dos portadores de carnés Miudiño e menores de oito anos tramitaranse de forma gratuíta. Os abonados recibirán os seus novos carnés nos seus domicilios, pero mentres poderán beneficiarse igualmente das vantaxes coa súa IDE do carné anterior -unha vez tramitada a renovación online-.
