Tapia e Baeza son as únicas novidades á parte dos canteiráns con minutos
07 oct 2020 . Actualizado ás 05:00 h.O Celta pecha o mercado cun total de 23 futbolistas, dos cales soamente dous non formaban parte do cadro de persoal da tempada pasada. Aínda que o club pechou catro incorporacións, Álvaro Vadillo puña rumbo ao Espanyol como cedido no último día da fiestra estival, mentres que Jeison Murillo xa estivo na segunda metade do curso anterior. Renato Tapia e Miguel Baeza son as únicas caras novas, ás que se suman os tres xogadores do filial que xa debutaron: Gabri Veiga, José Fontán e Miguel Rodríguez.
Portería
Un só gardameta do primeiro equipo dispoñible
O Celta conta nestes momentos -e desde finais da tempada pasada- cun só porteiro do primeiro equipo dispoñible, Iván Villar, debido ás lesións de Rubén e Sergio. Ademais, dos dous do filial que estaban a adestrar co primeiro equipo nestas semanas e indo convocados, Iago Domínguez e Ruly García, este último foise cedido ao Unionistas e está por ver se seguirá habendo convocatorias de tres gardametas e, de ser así, quen as completará. Aínda que Óscar chegou a dicir con claridade que se necesitaba un porteiro, non chegou reforzo nesa posición máis aló da incorporación de Patrick Sequeira para un filial co que tamén están realizando a pretemporada os mozos canteiráns Brais Rodríguez e César Fernández.
Defensa
Practicamente os mesmos
A defensa céltica non conta con ningunha cara nova respecto dos que acabaron o curso anterior. Certo é que Murillo e Lucas Olaza remataban as súas cesións á conclusión da pasada campaña e en ambos os casos logrouse que seguisen, novamente a préstamo. Polo demais, continúan os mesmos (Hugo Mallo, Kevin Vázquez e David Juncà nos laterais xunto ao uruguaio, e Néstor Araujo, Joseph Aidoo e Jorge Saénz como centrais) máis David Costas, de regreso tras a cesión en Almería. Nin o de Chapela nin o tinerfeño contaban para Óscar, pero non se logrou darlles saída e queda saber se entrarán nas convocatorias a partir de agora. Ademais, xa debutou o central José Fontán e completaron convocatorias os laterais Sergio Carreira e Diego Pampín. O eslovaco Robert Mazan desvinculouse do club tras varias cesións e sen chegar a ter protagonismo no club en ningún momento.
Centro do campo
A liña que máis se reforza pero a máis debilitada
O centro do campo é a liña que máis reforzou o club. Renato Tapia perfílase ata o momento coa mellor noticia, polo seu rendemento e porque o técnico, satisfeito co futbolista, cualificouno como «un acerto da dirección deportiva». Tampouco deixou malas sensacións ata o momento Miguel Baeza, unha aposta de futuro que chegaba ao club sen experiencia en Primeira e que tivo minutos en todos os partidos, no último deles, como titular. Polo demais, continúan Okay Yokuslu -aínda que tivo opcións de saír-, Denis Suárez, Fran Beltrán e Brais Méndez. Rafinha Alcántara e Filip Bradaric causaron baixas tras as súas cesións e, pola contra, Emre Mor regresou á dinámica do equipo e disputou todos os partidos no que vai de curso. O canteirán Gabri Veiga xa tivo minutos en dous compromisos, fronte ao Barcelona como titular.
Dianteira
Sen o ansiado nove
A dianteira era unha das parcelas que o Celta pretendía reforzar neste mercado, de acordo coas pretensións que fixo públicas Carlos Mouriño en agosto e que partían do acordo con Óscar. Con todo, tampouco houbo nove e o extremo que se fichou, Álvaro Vadillo, acabou por irse cedido ao Espanyol ante a total falta de minutos no inicio de Liga . Isto, sumado á venda de Pione Sisto ao Midtjylland e a que Smolov non continuou tras cesión, fai que o ataque celeste quede con Iago Aspas (autor de todos os goles ata a data), Santi Mina e Nolito. A eles sumar, desde o filial, o xuvenil Miguel Rodríguez, de 17 anos e que tivo os seus primeiros minutos ante Osasuna.
