Creo que o Celta é mellor equipo que tres desta liga pero está a apelarse moito aos milagres e estes aparecen só de cando en vez, e o do ano pasado foi moi grande.
O Celta ten que xogar desordenado, é un equipo máis de transición que de orde. Por iso considero cruciais as fichaxes, o acertar nese par de xogadores dos que se din van vir. Persoalmente considero un acerto a Murillo, porque é dinámico, pero o mediocentro debe selo igual. Un Radoja ou un Wass que van acertar na maioría da toma de decisións e que non poden ser estáticos pero tampouco pasarse de dinámicos como sucedía con Lobotka. Ademais, Iago Aspas, Mina e Rafinha son xogadores que viven da desorde. Os celestes tamén necesitan a un goleador. Nótase moito a ausencia de Maxi e creo que se necesita fichar a un dianteiro que poida achegar goles e sexa compatible con Iago.
Co Toto acabouse un ciclo. Berizzo puxo unha idea e o equipo identificábase polo seu adestrador, e iso non pasa agora. É normal que tocase unha transición despois de rozar unha final da Europa League, pero pasou demasiado tempo para atopar unha idea, algo que pode estar relacionado co tema da competitividade. Creo que o Celta compite mal porque a xente se vai caendo. Por iso eu collería antes de nada aos once que sei que van defender unha idea clara e a partir de aí ir unindo o resto.
