O Celta é o equipo que máis veces derrotou ao Barça de Luis Enrique
04 oct 2016 . Actualizado á 05:00 h.O Celta converteuse no primeiro equipo que lle gaña tres partidos noutras tantas tempadas ao Barcelona de Luis Enrique. A historia comezou no Camp Nou en novembro do 2014 co gol de Larrivey, seguiu en setembro do 2015 en Vigo co 4-1 e continuou na noite do domingo co 4-3. Outros dous equipos, ambos da liga española gañáronlle dous partidos en dous anos, o Real Madrid e a Real Sociedade.
O Celta non encadeaba tres vitorias consecutivas sobre o Barcelona en Liga desde a súa época dourada do cambio de século (2001-2003). Fora a única vez ao longo dunha historia centenaria de enfrontamentos. Trece anos despois, un Celta máis humilde e con menos pedigrí non só foi capaz de repetir a xesta, senón que o fixo ante a súa exentrenador. A primeira vitoria, no Camp Nou (onde nunca gañaran os celestes) foi un sorpresa para todos. Os vigueses tiveron en Sergio ao seu home máis destacado e a alianza dos paus para facer bo o tanto de Joaquín Larrivey tras o taconazo de Nolito. Meses despois, en Vigo, os culés devolvéronlle a moeda cun tanto de estratexia de Mathieu.
As dúas vitorias restantes consecutivas foron como locais e en ambas as marcando catro goles a un dos equipos máis impenetrables do campionato. Aspas marcou en setembro do 2015 dous dos goles nunha tarde que redondearon Nolito e Guidetti. Agora foi a quenda de novo de Aspas, pero con Pione Sisto (o único novato), e o Tucu Hernández como acompañantes, ademais do gol en propia meta de Mathieu. As tres vitorias foron na primeira volta.
Este resultado converte ao Celta na besta negra do equipo de Luis Enrique. Ninguén lle gañou ata a data tres veces, un rexistro que só poden acadar dous equipos este ano: a Real Sociedade, que coleccionou dúas 1-0 en Anoeta, e o Real Madrid, que o curso pasado gañou 1-2 no Camp Nou e dous atrás impúxose por 3-1 no Bernabéu.
Na liga no curso 15/16 os azulgranas perderon sete partidos: co Sevilla, Real Madrid, Real Sociedade, Atlético e Valencia, ademais de Celta. A cifra reduciuse a catro na 14/15 con Real Madrid, Celta, Real Sociedade e Málaga como únicos verdugos. Este ano, polo momento, levan dous: Alavés e Celta.
«Facerlle catro goles ao Barça non é nada sinxelo e nós levamos dous anos facéndollos. O traballo que fixemos durante a semana deu o seus froitos», comentou Sergio Álvarez.
A nivel individual Berizzo converteuse no único adestrador que lle gañou ao Barcelona en máis dunha ocasión. Sempre coas mesma armas, sen amedrentarse e buscando ao adversario preto da área rival. O próximo reto debe ser gañarlle dúas veces na mesma tempada, algo case imposible.
Os célticos dobraron en ocasións aos azulgranas
A vitoria do Celta cimentouse no seu descaro e na súa presión, máis aló dos erros de Ter Stegen e as rotacións de Luis Enrique. Porque o conxunto do Toto Berizzo dobrou en oportunidades de gol ao seu rival: nove fronte a catro, o que borra dunha plumada a teoría de que o Celta marcou todas as ocasións que tivo. Ao contrario, de catro disparos os culés fixeron diana en tres, un deles de penalti. Sergio Álvarez só tivo unha intervención decisiva ao longo de todo o partido, o que serve de referencia para o bo partido dos célticos a nivel defensivo. De feito o maior perigo culé chegou no xogo aéreo cos homes de segunda liña.
Os vigueses tamén finalizaron máis ataques que o seu opoñente, aínda que neste caso a estatística estivo moito máis igualada: 14-13.
No pase, o Barcelona foi máis seguro, pero o Celta impúxose nas asistencias decisivas. Porque mentres o colectivo de Luis Enrique acertaba en 412 dos 508 pases intentados, en realidade só filtrou á área rival con opción clara de gol oito, mentres que o Celta fixo 12 a pesar de que só acertou en 186 dos 277 intentos.
A vitoria do domingo é unha das poucas, ademais, que o cadro de Berizzo asinou a pesar de ter só unha terceira parte da posesión de balón: 34,6% fronte ao 65,4% do Barça. Neste apartado ten moito que ver a tendencia do segundo tempo, onde os vigueses apenas tiveron contacto co balón, mentres que no primeiro tempo foron protagonistas co esférico nos pés.