O arxentino admite que esta está a ser unha das súas mellores tempadas no fútbol europeo
15 abr 2015 . Actualizado á 14:01 h.Joaquín Larrivey marcou dous dos tantos da goleada do Celta ao Raio Vallecano, o seu exequipo. Non os celebrou, pero si acabou moi feliz polo triunfo do seu equipo, que así xa deixa a permanencia case feita e pode seguir de esguello as prazas europeas. «O soño de Europa témolo todos e xa veremos o que sucede. Nas últimas dúas ou tres xornadas será cando veremos se aínda é posible», razoa o dianteiro. Sabe que recortar sete puntos de distancia en sete partidos non é sinxelo, «pero en fútbol pode pasar calquera cousa, e máis nunha liga tan parella».
En todo caso, Larrivey entende o fútbol partido a partido. «Sempre digo, como me dicía un adestrador que tiven, que o partido máis importante é o seguinte», por iso evita pensar demasiado a medio prazo e pon o acento no encontro contra o Éibar.
A nivel persoal, o arxentino está a un gol de bater a súa marca en Liga, fixado o ano pasado en 12 goles co Raio. A súa intención é superar esa cifra porque entende que tanto a nivel individual como colectivo se deben mostrar ambiciosos. A nivel xeral, aínda que a tempada aínda non tocou ao seu fin, Joaquín admite que «é moi difícil de evalluar, porque a liga aínda non acabou, pero esta é das mellores tempadas que tiven en Europa. Está a ser boa no individual e no grupal e estou moi contento porque no Celta me atopei o que me agardaba», argumentou.