Pódese falar de maldición? O que OT uniu... xa o separarán despois os triunfitos. Pasou con Bisbal e Chenoa. E agora con Cepeda e Aitana. El anunciou a ruptura onte pola tarde nas redes sociais: «Hai algún tempo que necesitaba contar a nosa situación actual. Aitana e eu decidimos tomar camiños separados». ¡Vaia desgusto levouse a miña amiga Laurita! Ela sempre pensa que ao final triunfará o amor, pero non... Se hai dous días (literalmente), o galego lanzaba un novo single cunha chiscadela a Aitana. Glups. Cepeda pide aos que lle seguen pola música que continúen aí e aos demais, comprensión, porque «hai que respectar a vida e decisións alleas». Comezará unha guerra entre cepedistas e aitaners? Agardemos que non. Polo menos os fans terán o consolo de que, dentro dalgúns anos, cando se celebre a gala aniversario da resurrección de Operación triunfo, volverán cantar xuntos Cepeda e Aitana, como Bisbal e Chenoa. Agardemos que entón non haxa debate sobre ningunha cobra.
Enfrontamento
Keira Knightley a toma con Kate. Non se se estou acreditado para falar destes temas, que sempre son polémicos. Dirán que son un home e non teño nin idea. Pero ás veces abonda un pouco de sentido común. Ou talvez sexa ignorancia. Bo, a cousa é que a actriz Keira Knigthley, que foi nai un día antes que a duquesa de Cambridge, Kate Middleton, arremeteu contra ela por aparecer axiña que ante os medios, arregladita e coma se non pasase nada. A actriz, que publicou un ensaio sobre a maternidade titulado O sexo débil, diríxese a Kate con estas palabras: «Escóndeo. Esconde a nosa dor, os nosos corpos separándose, os nosos peitos goteando, as nosas hormonas rabiosas. Móstrate bela, estilosa, non ensines o campo de batalla, Kate. Sete horas despois de estar a loitar coa vida e a morte, sete horas despois de que o teu corpo se abra, e saia del vida ensanguentada berrando. Non o mostres. Non o digas. Posa aí coa túa nena e que che saquen fotos un grupo de fotógrafos homes».
Digo eu que a ninguén lle gusta ter que aparentar que todo é perfecto xusto despois de dar a luz. Pero que ía facer Kate? Eu penso máis ben que todo iso lle vai no cargo, aínda que non sempre estea de acordo. Ao final, igual que cando Keira presenta unha película vai sempre impecable e sen ensinar os seus defectos, o aspecto de Kate, neste caso, dalgún xeito tamén é traballo.