O Parlamento garda un minuto de silencio polo xenocidio de Gaza co apoio do PP, que despois votou en contra da proposta do Bloque
GALICIA
Rueda acusa á oposición de defender que haxa vítimas de primeira e de segundo por non solidarizarse cos asasinados por Hamás e móstrase claro respecto a Palestina: «Sabemos conscientemente que acabamos de condenar un xenocidio»
24 sep 2025 . Actualizado á 13:48 h.Fin ao culebrón sobre o minuto de silencio do Parlamento galego en solidariedade coas vítimas de Gaza. O pleno iniciouse esta mañá con este xesto simbólico, unha vez que o presidente da Cámara, Miguel Santalices, informou de que o grupo maioritario da Cámara, o PPdeG, aceptara o texto inicial que os socialistas remitiran á Mesa e no que se pedía unha condena expresa do xenocidio en territorio palestino. Os deputados puxéronse en pé sen que se dese lectura ao texto. Na quenda de preguntas ao presidente, Ana Pontón, portavoz do Bloque, cualificou este feito como algo «insólito», coma se houbese unha vontade de pasar no bico dos pés. Pero Alfonso Rueda despexou calquera dúbida minutos despois. «Sabemos perfectamente o que votamos, acabamos de condenar un xenocidio conscientemente», dixo o presidente, que acusou á oposición de defender vítimas de primeira e de segundo por non solidarizarse coas vítimas dos asasinatos de Hamás. É a primeira vez que un cargo do PP a nivel nacional pronuncia a palabra xenocidio. A líder do Bloque retou a Rueda a mostrar a súa coherencia votando a favor da proposición non de lei que o Bloque levará á sesión de hoxe.
Unha vez respectado o minuto de silencio, o asunto de Gaza enfrontou tamén ao Besteiro con Rueda. Para os populares, a proposta do PSdeG, secundada polo Bloque, era unha treta para tratar de trasladar á opinión pública unha falsidade: que o PP non se solidariza co ocorrido en Palestina, a pesar de que o propio Rueda cualificou hai días o ocorrido alí como unha animalada. «Vostede non quería que votásemos a favor, señor Besteiro», dixo Rueda, frase que o líder do PSdeG interpretou cono unha mostra de que os populares non cren no que votan. Pontón asegurou que é absolutamente inadmisible que o PP insista na idea de equiparar ás vítimas cos verdugos. E Rueda acusou aos nacionalistas de facer «politiqueo barato», por calar coa invasión de Rusia en Ucraína e defender que haxa vítimas de primeira e de segundo, en referencia aos israelís asasinados polo terrorismo palestino.
O texto do PSdeG enviado á Mesa do Parlamento polo que se gardou esta mañá o minuto de silencio condena «a masacre que está sufrindo o poblo palestino» e solicita esta petición «polas vítimas inocentes do xenocidio na Franja de Gaza e Cisjordania». Igualmente, o escrito denuncia o asasinato de 20.000 nenos e nenas, ademais de fogares arrasados e as condicións mínimas de vida destruídas. Tamén sinala a profunda inxustiza e a reiterada vulneración de dereitos humanos básicos, á vez que pide unha paz xusta e duradeira na rexión.
Proposta do Bloque rexeitada
A pesar de secundar o minuto de silencio polo xenocidio de Gaza, o PPdeG votou logo en contra dunha proposición non de lei do Bloque (defendida por Ana Pontón) na que se esixía o mesmo. De feito, o portavoz nacionalista pediu que se votase por separado o punto primeiro da iniciativa, que pedía manifestar unha clara e contundente condena do xenocidio que está a cometer o goberno de Israel contra o pobo palestino, ademais da ocupación sionista. Os populares posicionáronse tamén en contra. O liña co expresado por Rueda na Cámara galega, o PP explica que condena tanto as vítimas do masacre de Israel en Gaza como as vítimas do atentado de Hamás que derivou no conflito, e que non aparecen na proposición non de lei nacionalista.
Ana Pontón acusou a Rueda e ao PPdeG de «traizoar o sentir maioritario dos galegos e galegas cando vota en contra de que o Parlamento condene o xenocidio en Gaza». A líder nacionalista asegura que os populares están no lado equivocado da historia, equiparando vítimas e verdugos. «Palestina converteuse nun símbolo e se permitimos que gane a forza bruta, ninguén estará a salvo», advertiu o portavoz do Bloque.