Os fillos de Elisa Abruñedo, vítima do crime de Cabanas no 2013, ante o inicio do xuízo: «É revivir todo o que pasou»
GALICIA
Na primeira sesión na Audiencia Provincial da Coruña está prevista a constitución do xurado e a declaración do acusado, Roger Serafín Rodríguez
16 jun 2025 . Actualizado á 15:39 h.Os dous fillos de Elisa Abruñedo, a veciña de Cabanas asasinada no 2013 cando saíu a pasear polos arredores da súa casa, chegaron pouco despois das nove da mañá á Audiencia Provincial da Coruña, onde se celebrará esta semana o xuízo con tribunal do xurado. «É revivir todo o que pasou, pero é un momento moi agardado. Agardamos unha sentenza condenatoria», dixeron sobre o asasino confeso, Roger Serafín Rodríguez, ao que detiveron dez anos despois.
Un dos letrados da acusación particular, que pide 37 anos de prisión, asegurou que para os familiares a detención supuxo un alivio, e que están á espera do que faga o acusado na súa declaración, fixada para este luns. «Intuímos que vai facer gala desa memoria selectiva que ten», afirmou sobre o exposto polo procesado na fase de instrución sobre a que dixo que se acordaba dunhas cousas e «ignoraba» outras.
Por un delito de agresión sexual e outro de asasinato, o ministerio público pide penas que suman 32 anos. Desde outubro do 2023, Roger Serafín está na prisión á que foi trasladado tras ser detido pola Garda Civil no seu propio posto de traballo, no estaleiro de Navantia Ferrol, onde era operario dunha empresa auxiliar. Tras o arresto, confesou ser o responsable da violación e morte de Elisa Abruñedo dez anos atrás.
Segundo o escrito de acusación, entre as 20.45 e as 21.00 horas do 1 de setembro do 2013, o home conducía o seu vehículo cando viu camiñando á vítima pola estrada provincial DP-1503, nas inmediacións do seu domicilio. De inmediato desprazouse a un camiño de terra da zona, detivo o seu coche e dirixiuse á muller «abordándoa por detrás, agarrándoa fortemente cun brazo e golpeándoa na cara, na zona da mandíbula».
Acto seguido, segundo o Ministerio Fiscal, o procesado introduciuse no terreo situado ao lado da estrada «no que había piñeiros e abundante vexetación de monte baixo», arrastrando á vítima marcha atrás mentres a sostiña fortemente de costas a el, «percorrendo aproximadamente 17 metros ata o interior da parcela, onde non podía ser visto desde a estrada».
A continuación, violouna neste lugar e inmediatamente despois, o procesado «sacou repentinamente unha navalla ou coitelo do peto do seu pantalón e apuñalouna, propinándolle dúas coiteladas no torso e unha no pescozo», tras o cal fuxiu do lugar monte a través ata acadar o seu vehículo, no que abandonou a zona, provocando a morte da muller de xeito inmediato.
Por iso, Fiscalía pide unha pena de 12 anos de prisión polo delito de agresión sexual, ao que hai que sumar outros 20 por asasinato, reclamando tamén que sexan indemnizados os dous fillos da muller falecida con 200.000 euros, 100.000 para cada un deles.
Este luns estará dedicado á constitución do xurado e á lectura de informes e cuestións previas, estando previsto para esa xornada o interrogatorio do acusado.
O 17 de xuño será o inicio das testificales, cos fillos da falecida, veciños que descubriron o cadáver e a persoa que circulaba por un camiño veciñal, o tesoureiro da Sociedade de Caza ou Castro e dous veciños máis. Tamén o farán dous axentes da Garda Civil de Fene.
O día 18 serán seis axentes da Unidade Orgánica da Policía Xudicial da Garda Civil da Coruña, entre eles os que interviñeron nas primeiras dilixencias. Haberá tamén unha testifical-pericial de tres axentes da Garda Civil de Ferrol que fixeron a inspección e o levantamento do cadáver e outros tres especialistas do laboratorio de criminalística.
O día 19 será a pericial do médico forense autor do informe da autopsia, de especialistas do departamento de Bioloxía do Servizo de Criminalística da Garda Civil e da Sección de Análise do Comportamento Delituoso, así como a pericial sobre o estado mental/imputabilidade do acusado e informe psicolóxico dun dos fillos da vítima.
Para o día 20 fixáronse os informes finais e a posibilidade de que o proceso pronuncie a última palabra, mentres que a entrega do veredicto será o 25 de xuño.
a cronoloxía do caso
01-09-2013
A desaparición. Elisa Abruñedo sae a pasear un domingo a última hora pola contorna da súa casa na parroquia de Lavandeira en Cabanas. Non regresa e esa mesma noite o seu marido e os seus fillos denuncian a súa desaparición.
02-09-2013
Aparece o corpo. Delfín Feal foi un dos veciños que o domingo viu con vida a Elisa camiño do seu percorrido diario. Pouco antes das dez da noite localiza unha zona na estrada coa maleza está caída e penétrase cun familiar. Os dous descobren o seu corpo con signos de ser atacada e apuñalada.
17-10-2023
A detención. Tras dez anos sen pistas, os axentes da Garda Civil preséntanse no estaleiro de Ferrol e deteñen a un home como presunto autor do crime da veciña de Cabanas. É Roger Serafín Rodríguez, residente en Narón e nado no ano 1973 que se crío en Cabanas.
18-10-2023
A confesión. Roger derrúbase ante os investigadores e confesa que sentiu unha pulsión salvaxe ao ver a Elisa e entón cazouna, coma se seguise na batida da que estaba a regresar. Ao home asísteo un avogado de oficio que será o mesmo que o defenda no xuízo que comeza este luns.
19-10-2023
Ingreso en prisión. O acusado confeso de matar a Elisa Abruñedo (na imaxe) ingresa no penal de Mansilla de las Mulas de León, onde tamén se atopa cumprindo pena o Chicle, asasino de Diana Quer no 2016.
16-06-2025
Arrinca o xuízo. Comeza na Audiencia Provincial da Coruña o xuízo polo crime de Cabanas, 12 anos despois de que se producise. Na primeira xornada declarará o acusado. Os fillos e veciños que atoparon a Elisa farano na segundo e as dúas últimas reservaranse aos autores da investigación.