Ata 16.000 euros en axudas para obras e seguros por pór o piso en alugueiro en Galicia
GALICIA
O plan da Xunta activarase este verán e financiará o 80% do custo das reformas e ata 3.000 euros en pólizas durante cinco anos
19 may 2025 . Actualizado á 18:34 h.Os propietarios que poñan as súas vivendas en alugueiro poderán solicitar ata 16.000 euros en axudas á Xunta para reformar o inmoble ou pagar seguros de falta de pagamentos ou multirriesgo. As subvencións forman parte do programa Fogar Vivo, aprobado este luns polo Goberno galego, que agarda incorporar 1.300 pisos agora baleiros ao mercado do alugueiro. O plan activarase este verán.
A conselleira de Vivenda, María Martínez Allegue, explicou que as axudas para rehabilitación e acondicionamento dos inmobles ascenderán a un máximo de 11.000 euros ou ata o 80% do gasto nas obras. Será posible o pago anticipado de ata o 80% do total da axuda, e o resto abonarase cando se certifique a obra. O importe da subvención poderá ser de 2.000 euros máis se a vivenda se aluga a menores de 36 anos, dependentes ou a outros colectivos vulnerables.
A axuda para os seguros será dun máximo de 3.000 euros, que se poderán destinar a pagar as pólizas fronte a falta de pagamentos ou multirriesgo durante un máximo de cinco anos. Os fondos serán entregados aos propietarios, que poderán contratar coa empresa que prefiran.
O programa de subvencións conta cun presuposto de 5,7 millóns de euros. As solicitudes tramitaranse por concorrencia non competitiva, é dicir, por orde de petición. Os fondos, engadiu a consellería, poderían ampliarse segundo a demanda.
O principal requisito que deberán cumprir as vivendas é que leven tres meses baleiras. Deberán alugarse a «prezos asequibles». As cantidades máximas calculáronse mediante «criterios obxectivos», engadiu a conselleira, obtidos do rexistro das fianzas de alugueiro. A renda deberá oscilar entre os 450 e os 700 euros mensuais como máximo, dependendo da súa localización. O límite de 700 euros aplicarase na Coruña, Vigo, Santiago e Pontevedra. O tope será de 650 euros en Lugo, Ourense, Ferrol, Ames, Oleiros, Cambre, Baiona e Nigrán; 600 euros en Arteixo, Carballo, Narón, Ribeira, Sada, A Estrada, Cangas, Lalín, Marín, O Porriño, Ponteareas, Redondela, Mos, Poio, Sanxenxo e Vilagarcía de Arousa; 550 euros en Ares, As Pontes, Betanzos, Boiro, Cedeira, Cee, Fene, Melide, Mugardos, Neda, Noia, Ordes, Oroso, Padrón, Pontedeume, Teo, Burela, Cervo, Chantada, Foz, Monforte de Lemos, Ribadeo, Sarria, Vilalba, Viveiro, Allariz, A Rúa, O Barco de Valdeorras, Barbadás, O Carballiño, Celanova, Ribadavia, Verín, Xinzo de Limia, Bueu, Cambados, Gondomar, O Grove, Illa de Arousa, Moaña, Pontecesures, Tui e Vilanova de Arousa; e 450 euros no resto de localidades de Galicia.
No Consello da Xunta, que estivo presidido polo conselleiro de Presidencia, Diego Calvo, tamén se aprobou a autorización para construír 118 novas vivendas de promoción pública en Pontevedra, en tres parcelas cedidas polo Concello.
Esas vivendas forman parte do plan do Gobierno galego para duplicar o parque de vivenda pública nesta lexislatura.