O BNG esixe ao PP que desbloquee a convocatoria da comisión parlamentaria sobre o Consello de Contas
GALICIA
O portavoz nacionalista de Facenda, Noa Presas, insta a debater os informes emitidos polo órgano fiscalizador sobre diferentes cuestións
11 may 2025 . Actualizado á 16:12 h.O BNG acaba de rexistrar unha petición para que se convoque a comisión parlamentaria de relación co Consello de Contas, que leva oito meses sen reunirse, «para que se poidan debater e ver todas as propostas que hai que facer respecto dos informes emitidos» polo órgano fiscalizador.
A petición trasladouna o portavoz de Facenda dos nacionalistas, Noa Presas, que criticou «a deriva antidemocrática na que está instalado o PP». Aos populares, a deputada do BNG reclámalles que desbloqueen a Comisión e que «paren de amordazar o Parlamento galego».
Presas recriminou que, desde o inicio desta lexislatura, o PP impuxo un «atraso sen precedentes» na convocatoria da comisión para o debate dos informes e a aprobación da Conta Xeral. «Tanto a do 2022 como a do 2023 seguen sen someterse a debate, cando a súa aprobación polo Parlamento está recollida na lexislación», criticou.
A deputada nacionalista destacou ademais que nin sequera se chegou a debater o informe de fiscalización das eleccións, remitido en xullo do 2024. «Hai que debater os informes do Consello de Contas que poñen luz sobre a privatización da sanidade, sobre como o PP emprega recursos públicos para favorecer os contratos a dedo ou sobre como fai unha mala xestión dos fondos europeos», recalcou.