Natalia Prieto, directora xeral de Administración Local, indica que se instalaron 11.500 das 20.000 trampas previstas para frear a expansión desta avespa invasora
09 may 2025 . Actualizado á 08:23 h.A Xunta programou instalar 20.000 trampas na súa loita contra a praga da avespa velutina en Galicia. Polo momento, como destacou no Parlamento galego Natalia Prieto, directora xeral de Administración Local, xa foron instaladas 11.500 delas, cun rédito de 41.150 raíñas capturadas, principalmente nas provincias da Coruña e Pontevedra. Este é un dos principais eixos de actuación do plan de choque do Executivo galego contra esta especie invasora.
Prieto indica que se están instalando nos niños primarios, os primeiros en aparecer, xa que isto «evita a formación de niños secundarios e a conseguinte emerxencia de futuras raíñas coa chegada do outono». A encargada deste proceso está a ser a empresa pública Seaga. Están a centrarse os esforzos nas provincias de Pontevedra e A Coruña, onde se rexistra un maior número de incidencias a causa da velutina. Na Coruña xa foron capturadas unhas 10.100 raíñas mediante as 4.100 trampas instaladas e, en Pontevedra, a través de 3.700 trampas apresáronse máis de 21.700. O a provincia de Lugo hanse colocado unhas 2.110 trampas e, na de Ourense, máis de 1.400 delas.
Para a instalación das trampas, a directora xeral de Administración Local explica que se realiza un unha análise previa cos datos das localizacións dos niños de velutina durante a pasada campaña de captura, para potenciar a súa efectividade e minimizar que afecten a outras especies. As trampas revísanse cada 10 ou 15 días por 30 profesionais, e con outros 60 encargados do retirar os niños.
Prieto destaca que o sistema de trampeo empregado está avalado especialistas e coordinado por científicos e investigadores, o que permitiu que durante o 2024 o plan lograse «uns resultados óptimos». Durante esta pasada campaña, o programa conseguiu reducir un 46% o número de avisos xestionados por Seaga con respecto ao ano anterior, con máis de 113.000 raíñas capturadas a través dunhas 20.500 trampas instaladas en 261 concellos.
A Xunta tamén está a realizar distintas actividades de formación dirixidas ao persoal encargado de colocar as trampas, revisalas e retiralas posteriormente, ademais doutras de carácter divulgativo para que a poboación de toda a comunidade coñeza a especie, a súa expansión por Galicia e as súas consecuencias negativas. E o Executivo galego asegurou que continuará traballando para optimizar os resultados deste programa, ao que están adheridos todos os concellos galegos. Tamén lembra aos cidadáns que poden alertar da presenza dalgún niño desta especie a través do teléfono 012.