Galicia gaña 1.572 habitantes no primeiro trimestre do ano, de novo grazas á poboación estranxeira

Ao 1 de abril do 2025, Galicia tiña 2.716.996 habitantes, 1.572 máis que tres meses antes, segundo os datos da Estatística Continua de Poboación publicada este xoves polo Instituto Nacional de Estatística. Unha vez máis, o aumento de poboación débese á chegada de persoas estranxeiras, 4.639 máis neste primeiro trimestre, que compensan a caída de habitantes con nacionalidade española, 3.067 persoas menos. 

Aínda que a poboación galega con nacionalidade española supón o 93,4% do total (2.539.834 persoas), a estranxeira segue gañando presenza co 6,5%. Hai só un ano, ao 1 de abril do 2024, eran 158.875 as persoas que desde outros países asentáranse en Galicia; hoxe xa son 177.162, nova cifra marca.

No último ano, Galicia gañou 10.772 habitantes, un 0,4% máis respecto ao período anterior. Un crecemento que vén dado por esa chegada doutras nacionalidades diferentes á española e que acada case as 20.000 persoas (18.287). En canto aos españois, a comunidade galega perdeu poboación nos últimos doce meses, máis de 7.500 persoas. 

Os datos de Galicia seguen o patrón do resto de España; iso si, a menor ritmo. A poboación española tamén aumentou no primeiro trimestre do ano, un 0,15% máis, como no último ano, un 1,07%. Deste xeito, España contaba con 49.153.849 persoas ao 1 de abril do 2025, o máximo da serie histórica; 75.865 máis que hai tres meses e 429.977 persoas máis que hai un ano.

Do total da poboación, o 85,8% ten nacionalidade española, e o 14,1% outra nacionalidade distinta. Isto é, unha de cada sete persoas que viven en España son estranxeiras. Igual que en Galicia, foron os habitantes doutros países os responsables do crecemento de poboación: aínda que hai 19.498 españois menos, o aumento de persoas con outra nacionalidade foi de 95.363.

---

---

---