A catenaria viuse afectada polo xeo xerado polas baixas temperaturas rexistradas esta madrugada; o tren leva case catro horas de atraso
15 ene 2025 . Actualizado á 12:21 h.As baixas temperaturas impediron este mércores a circulación do AVE Ourense - Madrid das 6.30 horas, segundo confirmaron Renfe e ADIF.
Concretamente, a catenaria (os cables suspendidos que alimentan de electricidade ás locomotoras) viuse afectada polo xeo xerado polas baixas temperaturas rexistradas esta madrugada, o que interrompeu a circulación do convoi entre Taboadela e Meamán (no municipio de Baños de Molgas), ao redor das 6.55 horas.
Renfe enviou outro tren para retroceder ata Ourense aos viaxeiros, que foron recolocados no AVLO Vigo - Madrid das 7.45 horas, que saíu da cidade das Burgas pouco antes das 10.00 horas. Segundo informa o ADIF, xa se restableceu a circulación entre Taboadela e Meamán.
O convoi afectado, que debía chegar a Madrid antes das nove da mañá, acumula xa case catro horas atraso (237 minutos), e ten previsto arribar a Chamartín ás 12.42 horas.
Ante as preguntas en redes sociais de usuarios doutro tren dirección Madrid que denunciaban levar máis dunha hora parados na estación de Ourense, desde a conta @InfoRenfe contestaron que o convoi estaba detido «debido ás condicións meteorolóxicas adversas», algo que sorprendeu a algúns viaxeiros, que non conseguían ver cales eran eses problemas.
Renfe aclarou entón que «a infraestrutura ferroviaria atopábase xeada», e que iso detivera a un tren «en plena vía» e, como consecuencia, «atrasado o resto de circulacións» que quedaron detidas nas estacións.
Un deses trens afectados pola paralización do primeiro é o AVLO que debía chegar a Madrid ás 10.34 procedente de Vigo. Calcúlase que sufrirá máis de dúas horas de atraso (126 minutos). Pola súa banda, para o Alvia que debía arribar á capital española ás 11.36 procedente de Ferrol prevese unha dilación de hora e vinte.