O peche por Palestina na Facultade de Historia da USC obriga a realizar exames noutros centros

O peche da Facultade de Xeografía e Historia da USC por estudantes que esixen o fin dos ataques israelís en Gaza está a comprometer a seguridade do centro universitario e alterando gravemente a actividade docente, ata o punto de que os exames dos grupos de alumnos máis numerosos, a partir de oitenta, teñen que realizarse noutras facultades porque as cinco aulas máis amplas están ocupadas e outras dúas bloqueadas.

Este xoves cumpriuse o décimo día de peche na facultade do casco monumental de Santiago, iniciado o día 14 tras unha asemblea convocada pola organización estudantil Erguer, que o pasado mércores obtivo do goberno da USC a publicación dun comunicado, asinado polo reitor, Antonio López, no que insta a Israel a «deter o xenocidio practicado contra o pobo palestino» e comprométese a intensificar a colaboración coas universidades palestinas para contribuír a recuperar a súa normalidade e a non asinar acordos de colaboración nin manter relacións científicas ou académicas con universidades e institucións israelís nin con investigadores e docentes, así como relacións económicas con empresas dese país, que non compartan as mesmas reivindicacións.

Con todo, esta declaración da USC non serviu para frear a protesta, que derivou nunha situación insostible na Facultade de Xeografía e Historia, cuxo decano, Marco Virgilio García Quintela, tras os primeiros contactos cos estudantes encerrados, expresou comprensión cos obxectivos da protesta e incidiu «na necesidade de que fora compatible coa marcha relativamente ordinaria da facultade» en dous puntos que son estatutariamente responsabilidade do decanato: manter a seguridade do edificio e das persoas que se atopan nel e garantir a actividade docente, que neste momento consiste principalmente na realización dos exames finais.

Para facer un seguimento da situación e insistir sobre aspectos concretos que afectaban o cumprimento destes obxectivos, o decanato e a representación estudantil —esta cambiaba e non se identificaba— mantiveron reunións diarias ás dez da mañá, pero este xoves rompeu este vínculo e os responsables académicos xa non tiveron interlocución cos encerrados, entre os que había, afirman, alumnos alleos á Facultade de Historia e mesmo á USC.

Novas esixencias

«Na canle de comunicación que tiñamos cos pechados insistimos durante varios días desta semana nos dous puntos anteriores sen resposta positiva, ao tempo que aparecían novas esixencias sobre a mesa como a necesidade dunha aula de "baixa intensidade" e un "punto lila"», explicou o decano nun comunicado remitido este xoves ao conxunto da comunidade da súa facultade para dar conta da situación.

Mentres tanto, o que comezou como unha pequena acampada cunhas poucas/pouas tendas de campaña e sacos de durmir nalgúns corredores foi crecendo ata sumar ao redor de 150 persoas segundo fontes non oficiais, e o pasado luns foron ocupadas dúas aulas, o que impediu xa a celebración alí dos exames dos grupos máis numerosos e obrigou a buscar alternativas noutras facultades, inicialmente as de Filosofía e de Medicina, cuxa colaboración foi publicamente agradecida polo decano de Historia aos responsables de ambos os centros. Estas aulas alleas foron reiteradamente utilizadas durante esta semana. Ademais de dúas aulas coas portas saboteadas para impedir abrilas, foron ocupadas tres máis, e o decano expresou no seu escrito á comunidade da facultade que «non temos garantía de ubicar todos os exames da semana próxima», aínda contando coa axuda de Medicina e de Filosofía.

Os problemas de seguridade que causa o peche, con corredores ocupados e acumulación de material inflamable, agrávanse polos estruturais do edificio, cun plan de rehabilitación integral por 24 millóns de euros pendente de execución e urxencias como a ameaza de afundimento do chan do depósito da monumental biblioteca da facultade, que esixe o traslado inmediato de gran parte dos 145.000 volumes alí almacenados, operación que agora non se pode realizar.

---

---

---