O Goberno reactiva a reforma da Lei do Chan sen saber se terá respaldo no Congreso

O Consello de Ministros aprobou este martes o texto para a modificación da Lei estatal de Chan e Rehabilitación Urbana para que inicie a súa tramitación no Parlamento. O texto é o mesmo que decaeu na anterior lexislatura e que non se puido tramitar nas Cortes pola convocatoria de eleccións. A ministra de Vivenda e Axenda Urbana, Isabel Rodríguez, considera que dará «seguridade xurídica» e «evitará que os erros de carácter formal que sexan subsanables» poidan implicar a nulidade total dos instrumentos de ordenación territorial e urbanística. As modificacións afectan esencialmente aos trámites procedimentales, á legitimación para o exercicio de accións e á identificación dos posibles vicios que puidesen comportar a súa declaración de ilegalidade.

Con todo, o Goberno non sabe que respaldo poderá lograr no Congreso. O seu socio de coalición, Sumar, critica o recorte dos motivos de nulidade dos proxectos e considera que se limita a capacidade de intervención da administración pública. Tampouco gusta a outros grupos parlamentarios de esquerda, como Podemos. A secretaria de Acción Institucional de Podemos e coportavoz do partido, María Teresa Pérez, sinalou que esta reforma «dá vía libre á cultura do pelotazo» e servirá para que os «fondos voitre» poidan «especular sen límites» Pola contra, a Asociación de Promotores e Construtores de España (APCEspaña) cre que a reforma achegará maior seguridade xurídica, o que permitirá acelerar a construción de vivenda. Para o presidente de APCEspaña, Juan Antonio Gómez-Pintado, «se queremos facer fronte á falta de oferta de vivenda do noso país e as dificultades de accesibilidade necesitamos desenvolver e xestionar chan de xeito máis eficaz e con maior seguridade xurídica».

Con todo, desde Ecoloxistas en Acción sinalan que «a modificación da Lei de Chan estatal pretende pór freo ás sentenzas que declaran nulos de pleno dereito plans urbanísticos pola súa ilegalidade. Recorta a acción pública, o dereito da cidadanía a recorrer o urbanismo ilegal». O que actualmente sería un plan nulo pola ausencia dun informe sectorial, podería «librarse» achegándoo con posterioridade. Esta solución, din os ecoloxistas, tería un efecto perverso que só beneficiaría ao promotor.

O novo texto normativo pretende diminuír o risco de nulidades, reducindo a posibilidade de que a cidadanía recorra aos tribunais, sinalan desde Ecoloxistas en Acción. Chega a modificar, só para cuestións urbanísticas, a condición de parte interesada que atribúe a Lei de Procedemento Administrativo. Ademais acouta as cuestións que poderán recorrerse e o prazo para iso, limitando a catro anos o recurso indirecto que actualmente carece de límite temporal. A xuízo de Ecoloxistas en Acción, esta modificación é unha das máis graves pola afección a un dereito cidadán consolidado, a acción popular, e pola súa dubidosa constitucionalidade.

Para rematar, o anteproxecto presentado polo Ministerio de Vivenda e Axenda Urbana introduce novo articulado que permite cancelar a constancia rexistral do dereito de reversión, fundamentalmente nas expropiacións urbanísticas integradas en expedientes de equidistribución de cargas e beneficios (reparcelamentos). Este articulado autoriza que os terreos expropiados para un fin público e social, que non se incorporan ao mesmo por falta de execución pero cuxo dereito de reversión consta inscrito no Rexistro da Propiedade, poida ser cancelado cando pasa a unha nova propiedade privada.

Este articulado está redactado ad hoc para desbloquear a operación Chamartín ou Madrid Novo Norte, segundo a organización ecoloxista, que explica que boa parte do chan expropiado (actualmente propiedade de ADIF) non pode traspasarse ao promotor Crea Madrid Novo Norte (formado pola entidade financeira BBVA, construtora San José e a socimi Merlin Properties) polos problemas de inscrición rexistral, derivados dos dereitos de reversión, aínda inscritos, a nome dos propietarios orixinais dos terreos.

---

---

---