O TSXG nega que o XIDE, o sistema para dar citas en primaria, sexa un filtro encuberto de pacientes
GALICIA
Rexeita a demanda interposta polo Consello Galego de Colexios Médicos; a sentenza non é firme polo que cabe recurso
25 mares 2024 . Actualizado ás 16:24 h.A sección terceira do contencioso administrativo do Tribunal Superior de Xustiza de Galicia (TSXG) rexeitou o recurso do Consello Galego de Colexios Médicos no que solicitaba a retirada do novo programa de citas de atención primaria posto en marcha a finais do 2021, o XIDE. Trátase dun sistema no que o paciente explica ao administrativo do centro de saúde o motivo da súa consulta e leste oriéntalle ao profesional sanitario máis adecuado. O Tribunal rexeita os motivos da demanda, tanto no aspecto formal, como de fondo e transversal.
Respecto ao fondo, no recurso os colexios médicos entenden que o XIDE é un triaje encuberto, algo que só pode facer un profesional sanitario. Para o TSXG, «nin é un triaje nin un sistema encuberto de triaje». O alto tribunal asegura na súa sentenza, que non é firme, polo que cabe recurso contra ela, que este modelo «non vai encamiñado a valorar ou diagnosticar ao paciente, función que tan só se lle encomenda ao persoal sanitario».
Outro dos puntos polos que os colexios pedían a nulidade desta ferramenta é pola súa falta de transparencia e porque vulnera a confidencialidade dos datos médicos do paciente, xa que o usuario debe comunicar a un administrativo o motivo da súa consulta de saúde. No entanto, no fallo recóllese que non se pon en risco esta confidencialidade, xa que o paciente «sempre pode pedir consulta telefónica, sen que vexa obrigado a facelo de forma presencial, nin a facilitar datos ou información de índole sanitaria que non queira achegar, senón tan só o motivo da consulta para proceder á súa debida atención polos profesionais sanitarios, o que non só sucede coa asistencia primaria, senón tamén coa especializada e a de urxencia».
Tampouco ve o tribunal falta de transparencia no algoritmo que se utiliza para asignar a cita, «que non é senón un patrón ou documento de uso interno que recolle operacións básicas para a solución dun problema».
Finalmente, sobre os aspectos formais que denunciaron os colexios médicos, o TSXG asegura que non se trata dun regulamento nin unha instrución senón unha ferramenta que executa o persoal estatutario para dar apoio á xestión asistencial.
Desde o Consello Galego de Colexios Médicos, que actualmente ostenta o presidente do colexio de Lugo, Eduardo Iglesias , aseguran que acaban de recibir a sentenza polo que de momento a están estudando e tomarán unha decisión cando se reúna o Consello.