A noticia máis espectacular de onte sobre a campaña é que Mbappé deixará o PSG este verán. Será verdade? Ou será un rumor interesado dalgún dos partidos en liza nas galegas? Despois de Mbappé, que non recalará no Celta , o foco de interese está nas enquisas, que seguen facéndose, aínda que non se poidan publicar. Algunhas, segundo os fontaneiros dos equipos do 18F, falan dun resultado xusto. Estimulan o escenario de que hai partido.
Que non se perda ningún voto. Terán notado que a mensaxe dos políticos virou. Estamos no sprint final e todos chaman a votar, votar e votar. A que non se perda nin un voto. Será que a uns e a outros lles aperta o zapato das enquisas secretas? Sempre foi así. Os últimos días toca lembrar aos votantes que son xigantes da democracia e que o seu voto pode decidir un escano dun signo ou doutro. Pero como explica na web de La Voz o meu compañeiro Manuel Varela, non está moi claro se unha mobilización alta favorece ao bloque de esquerdas. Porque con grandes mobilizacións, non lle ha ir mal ao PP nas eleccións galegas.
A cultura e o PP. Os equipos non deixan ningún detalle no aire. O PP facía público onte que «catro grandes artistas mostran o seu apoio ao presidente Rueda e agradecen a súa aposta polo arte». Os nomes non son pataca minuta, que diría José María Caneda. Nada menos que os escultores Manolo Paz e Acisclo Manzano e os pintores Antón Lamazares e César Taboada gravan un vídeo mostrando sen complexos o seu apoio ao candidato Rueda . Os catro artistas compiten en apoiar a xestión da cultura que fixo Rueda para que poida seguir impulsándoa. Non se freguen os ollos. Un vídeo, que podería ter feito o Bloque, o PP hao colocado con éxito nas redes. A gravación desmonta esa crenza de que a cultura só pode ser de esquerdas, porque o progreso é algo que pertence exclusivamente a socialistas e a nacionalistas.
O PSOE sen tiro de tres. O presidente Sánchez continúa co seu apoio cego ao seu candidato Besteiro. Onte animouse a tirar con Besteiro unhas canastras nos campos de deportes da Torre na Coruña. Non fallaron nin o candidato nin Sánchez, ao que se lle coñece a súa paixón polo baloncesto. Pero ningún dos dous atreveuse co tiro de tres que anhela un PSOE para remontar nas enquisas seladas. Os socialistas necesitan un milagre para evitar un trompazo que pode facer historia.