Besteiro será candidato por Lugo e deixará a acta no Congreso para ser deputado autonómico
GALICIA
Asegura non ter tomado aínda a decisión de cando cesará en Madrid e propón a Rueda seis debates electorais
22 dic 2023 . Actualizado ás 14:51 h.O candidato socialista á Presidencia da Xunta, José Ramón Gómez Besteiro, confirmou esta mañá que encabezará a lista do PSdeG pola provincia de Lugo nas eleccións autonómicas do 18 de febreiro. Sinalou que será o primeiro candidato que opta a liderar o Goberno galego, coa excepción de Luís Villares no 2016 con En Marea, en presentarse por esta circunscrición, algo que non fixeran os populares Manuel Fraga, de Vilalba, nin Alberto Núñez Feijoo por Ourense, nin a nacionalista Ana Pontón (Sarria), que lembrou que o fixeron sempre polas provincias atlánticas. «Téñoo claro dende o principio. Responde a miña forma de ser, entender e de sentir», asegurou Besteiro.
Nun acto na Coruña, acompañado polo secretario xeral do PSdeG, Valentín González Formoso; a vicesecretaria e alcaldesa de Lugo, Lara Méndez, e o secretario de Organización, José Manuel Lage, o candidato propuxo ao presidente Alfonso Rueda a realización de seis debates electorais previos aos comicios nos que se traten asuntos «100% galegos». Catro destes serían territorializados en cada provincia, mentres que outros dous, explicou, celebraríanse cos líderes de cada partido. Besteiro acusou ao dirixente autonómico de convocar os comicios antes das festas de Nadal e coa campaña xa «no Entroido para evitar que a cidadanía se implique no proceso».
Descoñécese aínda se para entón, cando se inicie a campaña o día 2 de febreiro, Besteiro conservará aínda a acta como deputado no Congreso. «Non teño tomada esa decisión», respondeu sobre un asunto que considera «menor» e que aínda non contemplou. Agregou que si tivo que dimitir como delegado do Goberno antes das eleccións xerais porque a normativa electoral o facía inelegible, circunstancia que non aplica agora. Con todo, esa mesma lei si recolle que é incompatible posuír acta no Congreso e tamén no Parlamento.
A mesma situación viviu Antón Gómez-Reino nas eleccións galegas do 2020. Asegurou que cesaría no Congreso para ser candidato na comunidade, pero gardou o seu escano en Madrid durante todo o proceso. Finalmente, Galicia en Común quedou sen representación no Parlamento galego, pero o entón líder de Podemos Galicia asegurouse continuar en política ao manter a súa acta nas Cortes.
Aínda que Besteiro recoñece non contemplar aínda cando tomará a decisión de cesar como deputado en Madrid, a contorna do candidato si confirma que será deputado autonómico tras as eleccións, independentemente do resultado destas.