Rueda visita Castro Caldelas, o concello que volve ás urnas, aínda que sen o bus das canas
GALICIA
A alcaldesa en funcións, do PSOE, vetou o acto por considerar que era «electoralista», pero o presidente popular acudiu igual a arroupar ao seu candidato
19 nov 2023 . Actualizado á 19:36 h.Castro Caldelas é o único municipio galego que non puido constituír a súa nova corporación tras as eleccións locais de maio. A Xunta Electoral Central constatou irregularidades coa custodia e o reconto de 118 votos emitidos por correo, polo que obrigou a repetir as eleccións, que se celebrarán o vindeiro domingo 26. Nese contexto quixo chegar este domingo o presidente da Xunta e dos populares galegos, Alfonso Rueda, co bus promocional Galicia non para, unha foodtruck onde os veciños poden achegarse a compartir unha cana sen alcol con el á hora do vermú. Pero a alcaldesa en funcións, a socialista, Sara Inés Vega, desautorizou a ocupación do autobús na vía pública. En concreto, na praza do Prado, xusto no centro do pobo.
A rexedora xustificou que había «outras cousas previstas» alí a fin de semana, e que ata que pechen as urnas o vindeiro domingo non se poden celebrar actos de campaña nin colocar cartelería de carácter electoral. «É ético poñer un bus de dúas plantas e dúas carpas con consumicións gratis? Parece mentira que o presidente da Xunta se preste a este xogos», censurou a alcaldesa, que cualificou o acto como «puramente electoralista».
A pesar do veto da rexedora, Alfonso Rueda rematou visitando este domingo Castro Caldelas para arroupar ao candidato popular, César Enríquez Cachín. Iso si, sen o autobús. O presidente do PP galego chegou acompañado do seu número dous, a secretaria xeral Paula Prado, e polo líder provincial popular e actual presidente da Deputación, Luis Menor. «Frente ás trabas da esquerda, Galicia prefire ser unha illa de estabilidade, xestión e sentidiño», proclamou Rueda. Segundo un comunicado remitido polo PP, o líder dos populares galegos fixo un percorrido polo centro da localidade, onde lle regalaron unha bica, sobremesa típica da comarca, e desprazouse despois a comer nun restaurante onda «medio centenar de veciños e veciñas», entre os que se atopaban tamén alcaldes da zona.
«Dialogar e compartir momentos coa nosa xente é o mellor para seguir traballando pola nosa terra. Porque Galicia non para!», escribiu Rueda na rede social X, incluíndo ao final da frase o lema da campaña do autobús, que quedou aparcado nunha chaira de Santiago próxima á sede do Gobierno galego en San Caetano.
Encontro coa alcaldesa
Os socialistas ourensáns denunciaron este domingo pola tarde o «electoralismo» do acto celebrado polos populares, sinalando que se congregaron nunha céntrica praza da vila de «invitando a viño aos alí presentes». feita, fixérono nun bar situado na praza onde tiñan previsto acudir co bus.
Nunha nota de prensa, a alcaldesa desprazouse ata o lugar acompañada polos seus compañeiros e polo secretario provincial, Rafael Rodríguez Villarino. Segundo a versión dos socialistas, a rexedora reprochoulle a Rueda que sexa «a primeira vez» que acode á localidade, ao que o líder popular contestoulle: «Se me vas falar de política, alcaldesa, entonces non».