O prazo para solicitar unha das 270 prazas estará aberto ata o 8 de decembro
17 novs 2023 . Actualizado ás 13:11 h.Todos os maiores de 60 anos que vivan sos e non teñan con quen pasar este Nadal poden solicitar desde hoxe una das 270 prazas totalmente gratuítas do programa Xuntos polo Nadal, que organiza a Xunta.
Esta nova edición desenvolverase nas dúas residencias de tempo libre coas que conta a Consellería de Política Social e Xuventude, que son as do Carballiño e a de Panxón, en Nigrán.
O programa, totalmente gratuíto, inclúe a estancia en réxime de pensión completa, actividades cada día e o desprazamento en autobús desde as distintas cidades galegas. Serán 15 días, desde o 24 de decembro ata o 7 de xaneiro, ambos os incluídos.
As actividades serán variadas e adaptadas aos gustos e aos recursos patrimoniais e culturais da zona. Entre elas, inclúense actuacións musicais, sesións de cine, bailes, talleres, campionatos de cartas, excursións, sesións de risoterapia e de ximnasia, entre outras.
O prazo para presentar as solicitudes remata o próximo 8 de decembro, e poderá realizarse de forma online mediante o formulario da páxina web da Consellería de Política Social ou presentando a documentación en calquera dos lugares habilitados como rexistros da Administración autonómica.