A gratuidade do transporte interurbano para os menores de 21 anos amplíase a todo o 2024
GALICIA
A medida, que permite facer 60 viaxes gratuítos ao mes, aplicarase tamén aos maiores de 65 anos desde o 1 de xaneiro
15 novs 2023 . Actualizado ás 12:27 h.O Diario Oficial de Galicia (DOG) publicou hoxe a prórroga da tarifa Xente Nova, que abarca o transporte metropolitano para as persoas de 4 a 20 anos, e aos que se sumarán os maiores de 65 a partir do 1 de xaneiro ao entrar en vigor os Orzamentos da Xunta. Así, esta tarifa gratuíta estará vixente durante todo o 2024, desde o 1 de xaneiro ata o 31 de decembro.
A iniciativa, que permite facer ata 60 viaxes gratuítas cada mes, comezou no ano 2016 para os menores de 19 anos e no 2019 ampliouse ata os 21 anos.
No 2021, consolidouse o proceso de expansión territorial desta medida ao conxunto do transporte público da competencia da Xunta, de maneira que é aplicable para calquera viaxe interurbana que se realice nos servizos públicos de transporte regular, o que inclúe os autobuses (3.500 liñas) e tamén os barcos da ría de Vigo (Cangas, Moaña e Vigo) e na rede de Feve da comarca de Ferrol.