O debate de autonomía remata con 13 acordos aprobados por unanimidade
11 oct 2023 . Actualizado á 21:14 h.Non é habitual que os grupos parlamentarios acaden acordos unánimes, máis aínda cando un deles goza dunha maioría absoluta que lle abonda para aprobar os seus propios plans. Pero o debate de política xeral é algo distinto. A avaliación das 120 propostas de resolución dos tres partidos da Cámara pechouse este mércores ao mediodía con trece acordos aprobados co voto a favor de todos os deputados.
O Parlamento esixirá á Xunta iniciativas encamiñadas a facer unha serie de reclamacións ao Gobierno central, especialmente no ámbito das infraestruturas. Este punto, acordado entre as tres forzas, demanda coñecer unha «data concreta» para a chegada dos trens Avril, o impulso do AVE a Portugal, solucionar os problemas na liña de Media Distancia, a conexión de Lugo e Ferrol á alta velocidade ou a modernización da rede interior. Ademais do ferrocarril, solicitan o avance na construción de infraestruturas autonómicas como a vía de alta capacidade Costa Norte ou a autovía da Costa da Morte e acelerar a rehabilitación dos dous viadutos da A-6 en Pedrafita.
Transferencias
Tamén coinciden en reclamar a reunión do Consello de Política Fiscal e Financeira para debater o novo modelo de financiamento autonómico; a xestión dos fondos europeos; a rebaixa ao 0% do IVE na carne e o peixe; ou o bono de 5.000 euros anuais a dependentes. A oposición referenda con isto último o anuncio estrela do presidente Alfonso Rueda no inicio do debate sobre o estado da autonomía.
Os tres partidos solicitan, ademais, a convocatoria da Comisión Mixta de Transferencias para axilizar o traspaso da AP-9 ou a xestión do ingreso mínimo vital. En total foron nove proposicións pactadas polos populares coa oposición. E iso que as intervencións dos viceportavoces parecían indicar o contrario.
Empezou Begoña Rodríguez Rumbo, viceportavoz socialista, quen viu ao titular da Xunta «sometido ás propostas e ocorrencias de Isabel Díaz Ayuso, unha mostra máis da invisibilidade política do presidente substituto Rueda», a quen acusou de irse «de canas», na campaña dos populares onde o presidente viaxa en autobús, porque «ninguén o coñece». Rodríguez Rumbo retou aos populares a votar contra iniciativas sobre memoria histórica ou igualdade, como así fixeron despois, «seguindo o marco de Vox».
O viceportavoz do BNG, Luis Bará, insistiu na formulación de que o debate enfrontaba o modelo do Bloque co do PP. «O luns vimos ao señor Rueda escribindo o epílogo dun tempo pasado e a [Ana] Pontón no abrente dunha nova Galiza», sintetizou nun discurso onde advertiu sobre a «perda de peso» económico, demográfico e político da comunidade durante os catorce anos de Gobierno popular.
A terceira en intervir foi a popular Paula Prado, quen eloxiou a Rueda como un presidente que «demostrou estar á altura de Galicia» e que «os galegos merecen». Afeou á oposición que, «ano tras ano», a intervención no debate sempre sexa a mesma, e acusou a Pontón de ser «a gran esperanza» que «ocupa o mesmo escano dende hai vinte anos».
Polémica polo Consello
O segundo día do debate do estado da autonomía empezou cun minuto de silencio en memoria das catro vítimas mortais, tres delas menores, no incendio dunha vivenda en Vigo. O Goberno galego ocupou a primeira fila, pero ao termo da homenaxe, abandonaron o hemiciclo. O presidente Alfonso Rueda reunira antes aos seus conselleiros no encontro semanal do Consello da Xunta, e procedía a continuación a comparecer ante os medios xunto ao conselleiro de Facenda, Miguel Corgos.
Os dous partidos da oposición acusaron ao titular do Gobierno galego de «silenciar» á Cámara no «debate máis importante do ano» por haber «contraprogramado» a reunión do Consello co pleno. Rodríguez Rumbo condenou que a «ausencia do presidente» reflicta un «novo intento de silenciar aos grupos da oposición». Bará definiu esta «contraprogramación» como un «auténtico desprezo» aos deputados.
Ao paso saíu Paula Prado, ao lembrar que José Ramón Gómez Besteiro confirmou o luns que se postulará ás primarias do PSdeG para optar a ser candidato á Xunta. «Viñeron presentar o seu candidato ao Parlamento como se fose a sede do PSdeG», reprochou a deputada, que diferenciou que Alfonso Rueda atopábase celebrando o Consello da Xunta e non «presentándose como candidato as primarias». «Iso si é unha falta de respecto á institución», censurou.