Un lucense de 80 anos, interceptado tras circular en sentido contrario pola A-6 durante 18 quilómetros
GALICIA
O home, veciño do municipio do Corgo, foi visto por varios condutores cos que se foi cruzando e que alertaron á Garda Civil
14 jul 2023 . Actualizado ás 19:19 h.A Garda Civil anunciou este venres que unha patrulla do subsector de tráfico de Lugo interceptou na noite do martes a un condutor de 80 anos que circulou durante polo menos 18 quilómetros en sentido contrario pola A-6. O coche, finalmente, foi detido pola Benemérita antes de que se producise ningún accidente.
O suceso ocorreu ao fío das 23.00 horas do martes, xa caída a noite. O 112-Galicia recibiu entón diversas chamadas de persoas que circulaban pola Autovía do Noroeste en diversos puntos da provincia de Lugo, e que afirmaban ter visto un turismo circulando en sentido A Coruña utilizando os carrís destinados cara a Madrid.
Conduciu durante 18 quilómetros en sentido contrario
O primeiro aviso situouse no quilómetro 461, á altura do municipio de Baralla. Así, foron sucedéndose ata que unha patrulla da Garda Civil do posto de Becerreá interceptou o vehículo á altura do quilómetro 479, preto do Concello do Corgo.
Tras parar o coche, que se arrimou á beiravía, os axentes identificaron o condutor, un veciño dese mesmo municipio de 80 anos de idade.
Posible delito de condución temeraria
Os gardas, tras comprobar que estaba en bo estado, informárono dos seus dereitos en calidade de investigado pola suposta comisión nun delito de condución temeraria e instruíron as correspondentes dilixencias, que foron remitidas ao Xulgado de Instrución de Becerreá.
A Garda Civil, a través do seu departamento de comunicación, lembra que «a condución dun vehículo de motor ou ciclomotor con temeridade manifesta e pondo en concreto perigo a vida ou a integridade das persoas está castigado no Código Penal coas penas de prisión de seis meses a dous anos e privación do dereito a conducir vehículos a motor e ciclomotores por tempo superior a un e ata seis anos».