O PSdeG anuncia o seu apoio á lei de litoral que o Goberno considera «anticonstitucional»
GALICIA
O secretario de Estado de Medio Ambiente chegou a cualificar o texto como «declaración de independencia»
27 abr 2023 . Actualizado ás 13:05 h.O líder dos socialistas galegos avanzou esta mañá que o seu partido apoiará a lei de ordenación do litoral que aproba hoxe o Consello da Xunta. «Dende que asumimos a secretaría xeral, a defensa dos servizos públicos e dos intereses do tecido produtivo de Galicia está por riba de todo», reflexionou Valentín González Formoso. «Mesmo por riba do partido», advertiu a continuación para comunicar que o PSdeG apoiará a tramitación dunha lei «que pretende dotar a Galicia dunha ferramenta para preservar o litoral e o modo de vida das 40.000 persoas que dependen da cadea mar-industria», engadiu sobre un sector que achega 9.000 millóns de euros ao PIB da comunidade, cifrou.
«A lei é unha oportunidade para preservar a sustentabilidade do sector», dixo sobre unha normativa contra a que o Goberno central, do seu mesmo signo político, alegou e criticou como «anticonstitucional». O secretario de Estado de Medio Ambiente, Hugo Morán, chegou a cualificala nunha entrevista como unha «declaración de independencia», advertindo sobre a necesidade de que Galicia modificase o seu Estatuto de Autonomía para acceder a esta competencia, como fixeron anteriormente todas as comunidades autónomas que obtiveron a xestión e ordenación da súa costa. Formoso valorou que a lei vaia a dotar a Galicia «de ferramentas que permitan autorregular concesións e autorizacións neste sector» e de dar aos seus traballadores «seguridade xurídica».
O secretario xeral socialista tamén indicou que o seu partido fará achegas ao trámite parlamentario dunha lei na que ve «certas eivas que deben ser correxidas». «O PSdeG está na postura de defender os intereses de Galicia por riba de calquer interese, incluso por riba do partido», subliñou.
Mostrouse crítico con que a Xunta inicie agora un trámite que non fixo en catorce anos. «Con distintos Gobernos, nunca deron o paso para intentar regular e xestionar estas competencias», lamentou, esixindo que este traspaso se trate «como asunto de país». Sobre o percorrido da norma, tras as alegacións presentadas contra ela desde o propio Executivo central, Formoso lembrou que existen informes favorables, como o do Consello Consultivo, que garanten a súa viabilidade. «Queda camiño por diante para esclarecer a mellor maneira para levar a ley á práctica, pero o tecido mar-industria quere que se lle preserve a seguridade xurídica», expuxo, reclamando tamén á Xunta que non utilice esta cuestión como unha arma de confrontación co Estado xa que «é o diálogo» a forma de solucionar os problemas existentes.
