Oleiros mantense no primeiro posto en renda por habitante, a pesar de perder 44 euros por veciño nun ano; segue duplicando a do máis pobre
07 oct 2022 . Actualizado ás 20:39 h.Oleiros mantense un ano máis á cabeza dos concellos máis ricos de Galicia. Así o revela o último estudo do Instituto Nacional de Estatística, que recolle cales son os municipios con maior renda anual por habitante no 2020 e sitúa á localidade coruñesa no primeiro posto galego, cunha media de 16.403 euros.
A pesar de manter o liderado, esta cifra supón o primeiro descenso nos últimos cinco anos; no 2019 rexistraba unha renda de 16.447 euros (44 euros máis), e no 2015 de 14.851. Outros tres concellos da provincia da Coruña séguenlle en riqueza por habitante. Trátase das Pontes (15.482 euros por veciño), Santiago (14.649) e A Coruña (14.590). Todos, no seu caso, aumentando a renda per cápita respecto ao exercicio previo. O que máis o fai é As Pontes, con 421 euros máis, fronte aos 145 e 55 de Santiago e A Coruña.
A pesar destas variacións, non hai cambios na parte superior da lista. Os dez concellos que o ano pasado eran os máis ricos continuaron séndoo no 2020 e, excepto Oleiros, todos teñen máis renda que no exercicio previo. Nos que máis subiu é nos que pechan ese top-10 : Parada de Sil (13.517) e Nigrán (13.533), que melloran en 442 e 433 euros respectivamente en relación cos datos do 2019.
Do resto das cidades galegas, Vigo é a terceira máis rica, con 13.163 euros anuais. A cuarta é Ferrol (13.115) e a quinta, Pontevedra (13.047). Á cola están Ourense e Lugo, con 13.036 e 12.992 euros respectivamente. Con todo, ningunha as urbes é o concello da súa provincia con mellores cifras. En Lugo é Cervo, con 14.287 euros, a localidade que ocupa este posto, mentres que en Pontevedra e Ourense osténtano Nigrán (13.533) e Paradas de Sil (13.517).
En canto aos datos por provincia, a da Coruña conta cunha riqueza media de 12.841 euros de ingresos ao ano por habitante, de modo que é a única galega que se sitúa na metade alta de todas as provincias españolas. No outro hemisferio, aínda que moi próximas á media, están as de Lugo (12.021), Ourense (11.937) e Pontevedra (11.881).
O dobre que o máis pobre
A renda por cabeza dos concellos que se atopan na cima da lista duplica a do que se sitúa no outro extremo: Avión, na provincia de Ourense, con 7.565 euros por cabeza. Mantense á cola, a pesar de gañar tamén renda, aínda que non suma máis que 31 euros respecto ao ano anterior. Séguenlle nesta orde Beariz (9.062 euros per cápita), A Lama (9.152), Fisterra (9.224) e Boborás (9.299).
Tampouco hai cambios neste extremo do ránking e os dez concellos que no 2019 ocupaban os últimos postos mantéñense na mesma posición. Pero destes, seis aumentan a súa renda respecto ao ano anterior.
No outro extremo, o que máis mingua é Triacastela que, con 9.519 euros de renda por habitante perde 185 respectos ao exercicio previo. Fisterra e Meaño (que ocupa o décimo posto), teñen 89 e 81 euros menos respectivamente e A Cañiza perde só dez euros. Pola contra, o que máis suma é Boborás, con 415 euros máis de renda que no 2019. Séguenlle Beariz e A Lama, que se elevan en 322 e 232 respectivamente. Nos que menos ascende é na Illa de Arousa (173), Camariñas (152) e, para rematar, o propio Avión.
En comparación co resto de España, case o 70 % das localidades galegas sitúanse por debaixo da media, é dicir entre os municipios de renda baixa.