José González: «Estes incendios teñen un comportamento que nunca se vira en Galicia»
GALICIA
O conselleiro de Medio Rural defende que «sobre todo nas horas centrais do día, ese comportamento extraordinario dos lumes de Valdeorras, O Courel e Oímbra fai que non funcionen as técnicas de extinción»
19 jul 2022 . Actualizado ás 17:50 h.O conselleiro de Medio Rural, José González, cualificou á primeira hora aos principais lumes aos que fai fronte desde o xoves Galicia -en concreto, aos de Valdeorras e O Courel, onde permanece activada a situación 2 de alerta, e ao de Oímbra, no que nas últimas se desactivou- como de incendios de «comportamento máis extraordinario».
O titular de Medio Rural insistiu en Radio Galega que estes lumes «provocaron pirocúmulos que traían consigo ata cambios na propia climatoloxía do interior da zona, e iso foi o que determinou a decisión técnica de facer o desaloxo pola necesidade de protexelos a eles en primeiro lugar», remarcou, xustificando a necesidade dos diferentes desaloxos de veciños nos últimos días nas provincias de Lugo e Ourense ante a «extraordinaria virulencia» dos lumes e o seu «errático» comportamento, con cambios de vento e elevadas temperaturas. «Ou que era a cabeza convertíase en cola», ejemplificó.
No entanto, asegura que se irá «facilitando acceso a aldeas» dos veciños en función de como evolucione a situación. Sinala que o pasado luns houbo «proximidade de chamas» a unha vintena de aldeas de Valdeorras e O Courel. Así, cando os criterios técnicos o permitan, irase deixando volver ás persoas, asegura.
«O que me din os técnicos, e estamos comprobando, é que os incendios teñen un comportamento que nunca se vira en Galicia e que fai, sobre todo nas horas centrais do día, que é cando se producen os problemas, que queden fora da capacidade de extinción, que non funcionen as técnicas de extinción; o único que tratamos é de garantir a seguridade das persoas», engadiu González.
O conselleiro aclarou que os traballos realizados a pasada madrugada do martes «están a ser efectivos» con contraincendios e pas, ao que se une unha baixada das temperaturas.