Prohibidas as beirarrúas e as estradas. Así son as normas básicas que deben seguir os usuarios e que se difunden nun vídeo informativo da DXT
29 mar 2022 . Actualizado á 17:57 h.A Dirección Xeral de Tráfico creou un vídeo informativo que será difundido entre as empresas distribuidoras de patinetes eléctricos compartidos para dar a coñecer as normas que deben cumprir os usuarios deste tipo de vehículos de mobilidade persoal (VMP) nos seus desprazamentos urbanos. No 2020 morreron oito persoas que circulaban neste tipo de vehículos, sete deles en accidentes ocorridos en vías urbanas, e un, nunha estrada interurbana, onde o uso de VMP está totalmente prohibido. No vídeo da DXT lémbranse as normas sobre patinetes eléctricos que se recollen no Regulamento Xeral de Vehículos. Son estas:
Máximo de 25 quilómetros por hora e unha soa praza. Os vehículos de mobilidade persoal, tal e como establece o citado regulamento, son dunha ou máis rodas, teñen unha soa praza e propulsados exclusivamente por motores eléctricos que poden proporcionar ao vehículo unha velocidade por deseño de entre 6 e 25 quilómetros por hora.
Sen asento. Soamente poden estar equipados cun asento ou sillín os VMP que estean dotados dun sistema de autoequilibrado. Esta definición exclúe aos vehículos destinados ao uso de persoas con mobilidade reducida.
Non poden circular polas beirarrúas. Os vehículos de mobilidade persoal teñen prohibido circular polas beirarrúas, que quedan reservadas para os peóns. Só poden circular pola calzada ou por zonas especialmente habilitadas nas cidades.
Tampouco poden ir pola estrada. Os patinetes eléctricos só poden circular por zonas urbanas. É dicir, está prohibido o seu uso na estrada, travesías, autoestradas, autovías ou en túneles urbanos.
Nin alcol nin drogas. Os seus condutores están sometidos ás mesmas taxas máximas de alcol permitidas pola lei de tráfico e seguridade viaria, así como á prohibición de conducir con presenza de drogas no organismo. Ademais, no caso dos condutores menores de idade, a taxa de alcol é cero.
Prohibidos os auriculares e o móbil. Os usuarios de patinetes eléctricos tampouco poden levar auriculares postos nin facer uso do móbil ou de calquera outro dispositivo mentres van conducindo.
Con casco. Na recente lei de tráfico, que entrou en vigor o pasado 21 de marzo, establécese a obrigación aos condutores de VMP de utilizar casco de protección, nos termos que regulamentariamente se determinen. A DXT está xa traballando nese desenvolvemento normativo de forma conxunta cos concellos e cos actores implicados.
Manual de características. Tráfico elaborou un manual de características dos vehículos de mobilidade persoal, un documento normativo no que se recollen as características técnicas que deben cumprir os VMP para poder circular polas vías públicas e a obrigación de que ditos vehículos fosen certificados polos organismos competentes.
Difundido por empresas de patinetes compartidos
Tráfico indica que este vídeo será difundido polos provedores de patinetes eléctricos e tamén polas empresas de vehículos compartidos de mobilidade persoal que se poden atopar en moitas cidades, así como coa Asociación Española de Economía Dixital (Adigital). Trátase de que o cidadán que opte por desprazarse neste tipo de vehículo visione o vídeo para coñecer a normativa básica pola que se rexe este novo medio de desprazamento urbano e cales son os principais consellos de seguridade.
O vídeo foi presentado este luns nun acto ao que asistiron o director xeral de Tráfico, Pere Navarro, e María José Aparicio, subdirectora de Formación e Educación da DXT. Por parte dos provedores de vehículos compartidos de mobilidade persoal asistiron os responsables de Bird, Antonio Relaño; de Lime, Arnau Pérez; de Superpedestrian, Manuel Ortiz; de Bolt, Andrea Vota, e de Go TO, Luisana Zitzen.
Os representantes empresariais fixeron chegar ao director de Tráfico a súa preocupación pola seguridade e a aposta que están a facer en investigación, desenvolvemento e innovación, para mellorar os novos modelos que van pondo en circulación e evitar os fallos humanos, na medida que a tecnoloxía permita.