![Imagen de archivo de una protesta, en Cervo durante el 2021, por el caso de A Maruxaina](https://img.lavdg.com/sc/vS0aUBwHmDUDEP7n8LS16JuvZA8=/480x/2022/03/07/00121646678462208464504/Foto/X04A1027.jpg)
A norma busca incidir na loita contra a discriminación e os ataques sexistas
07 mar 2022 . Actualizado á 20:12 h.A Xunta abriu a consulta pública a Lei para a igualdade efectiva de mulleres e homes de Galicia co obxectivo de que colectivos e particulares fagan as súas achegas á norma. O prazo de presentación finaliza o 21 de marzo, tras o que seguirá a tramitación deste texto. A lei busca incidir na loita contra a discriminación e os ataques sexistas, así como na plena igualdade laboral.
O último antecedente lexislativo desta lei é o decreto do ano 2015 que refunde as leis dos anos 2004 e 2007. Aínda que foron normas con importantes melloras no campo da igualdade, é preciso avanzar neste campo, argumenta a Xunta, e de aí a necesidade deste texto, que ademais debe incluír novidades como a incidencia da dixitalización.
Evitar o caso Maruxaina
Entre as incorporacións da lei figuran a protección de mulleres e nenas contra ataques sexistas e a súa difusión a través de redes ou medios tecnolóxicos, evitando que se repitan situacións como a vivida hai uns anos na romaría da Maruxaina, onde se gravou a mulleres ouriñando, subindo as imaxes a páxinas pornográficas.
Cidades seguras
Outro piar da lei serán os programas municipais para crear cidades seguras, con espazos urbanos libres de violencia e acoso sexual a través de rutas peonís seguras, sinalizacións claras ou paradas a demanda no transporte urbano.
Benestar laboral
No ámbito do traballo incorporarase a idea do benestar laboral da muller e regularase a formación mínima en igualdade para implantar plans e medidas que afecten a este ámbito. Tamén se regulará o estatuto específico da muller rural e do mar, co compromiso de defender as súas necesidades nas políticas de emprego autonómicas e unha relación de dereitos e medidas para fomentar o seu asociacionismo.
No último Consello da Xunta, Alberto Núñez Feijoo anunciou xa o inicio dos trámites para iniciar o desenvolvemento desta lei que pretende loitar contra a discriminación e violencia contra a muller.