ENQUISA DE SONDAXE. O BNG afiánzase como segunda forza e o PSdeG segue na terceira praza. Os galegos ven mellor a situación política en Galicia que noutras comunidades. As primarias no PSdeG, tamén neste barómetro
23 oct 2021 . Actualizado ás 17:40 h.Cambia o campo de xogo. O levantamento do estado de urxencia sanitaria, que estivo vixente o último ano e medio en Galicia, pecha simbólicamente un ciclo político marcado de xeito transversal pola pandemia do covid-19 e as restricións que condicionaron o labor de partidos e institucións. O barómetro de outono elaborado polo Instituto Sondaxe pon o broche a esta etapa, consignando algunhas variacións, pero mantendo ao PP de Alberto Núñez Feijoo co respaldo maioritario do electorado tras a xestión desta pandemia.
O traballo de campo da enquisa foi levado a cabo entre o 14 e o 21 de outubro, datas nas que o Parlamento galego albergou o debate sobre o estado da autonomía e que sorprendeu ás dúas forzas da oposición, o BNG e o PSdeG, con procesos internos abertos para renovar ou ben os seus liderados ou ben os seus órganos de dirección.
A foto fixa de Sondaxe mostra a un PP que acusa un lixeiro desgaste desde as autonómicas, ao retroceder algo máis de dous puntos en estimación de voto. No entanto, o partido retén un nivel de apoio suficiente como para revalidar a maioría absoluta con 39 escanos, tres menos que no 2020, un máis dos precisos para gobernar en solitario.
O BNG consolídase como segunda forza, cun incremento de voto de dous puntos e situando a Ana Pontón como cabeza da alternativa a Feijoo e a segunda líder mellor valorada tras o presidente da Xunta. Os nacionalistas suman un deputado máis en Lugo, obtendo un total de 20 actas. O crecemento do Bloque susténtase na alta fidelidade dos seus electores (un 85 % dos que lles votaron no 2020 repetirían) e o transvasamento das mareas.
En canto ao PSdeG, revalida os 14 escanos obtidos nas autonómicas do 2016 e o 2020, pero retrocedendo 2,4 puntos en voto estimado e baixando nas catro provincias. Ten ademais unha baixa fidelidade (73 %), máis acentuada en eleccións xerais.
Ese estancamento ábrelle unha fiestra a Galicia en Común, a marca de Podemos, que obtería dous escanos co 6 % dos votos, despois de abandonar o Parlamento galego hai un ano.
A enquisa reflexa que os galegos teñen a percepción de que o Goberno da Xunta é mellor que o doutras comunidades. O barómetro de Sondaxe reflexa que o 37,1 % dos cidadáns veno así, mentres que un 18,8 % considera que aquí se goberna peor que noutras autonomías. Para outro 27,9 %, o Goberno galego é «máis ou menos igual» que os demais, mentres hai un 11,6 % que sostén que é mellor ou peor, segundo sexa a comunidade con que se compare.
A percepción de que o Goberno galego é mellor é cinco puntos máis ampla entre os homes que entre as mulleres, e esa sensación pasa o 46 % no grupo de maiores de 65 anos.
Primarias no PSdeG: Gonzalo Caballero ten máis nivel de coñecemento, e Formoso consegue maior valoración
As primarias que o PSOE galego celebrará xusto nunha semana para elixir ao seu secretario xeral son unha das cuestións polas que preguntou Sondaxe. O resultado é que Gonzalo Caballero é o candidato co maior nivel de coñecemento: o 83,3 % dos galegos están familiarizados co seu nome, algo comprensible pola proxección que ten como actual líder do partido. A Valentín González Formoso, o outro candidato, coñéceno o 35,6 % dos entrevistados. En cambio, o alcalde das Pontes e tamén presidente da Deputación da Coruña ten unha valoración máis alta, unha 5,36 fronte 4,67 do actual secretario xeral en funcións.
Caballero é o aspirante preferido polos votantes socialistas das autonómicas: danlle unha nota 6,31, fronte ao 6,19 que conceden a Formoso. Este último imponse entre os votantes do PSOE nas xerais, que lle outorgan unha puntuación de 6 sobre 10.
O bloque de esquerdas, maioritario en Galicia ante unhas eleccións xerais
Á marxe do escenario das autonómicas, o estudo elaborado por Sondaxe analiza tamén a incidencia que terían unhas eleccións xerais en Galicia, tendo en conta do voto dual que adoita practicar segundo sexa o ámbito da convocatoria.
A proxección sinala que o PP recupera a condición de forza hexemónica, rompendo o empate técnico que asinou co PSdeG en novembro do 2019, aínda que o bloque de esquerdas sería o maioritario. Os populares superan ao PSdeG en máis de cinco puntos, con 10 deputados en Madrid. O apoio aos socialistas, en cambio, retrocede tres puntos. Ceden un escano, quedándose en nove. A forza que sae beneficiada dese desgaste é o BNG, que avanza catro puntos en voto e suma ao escano da Coruña un segundo por Pontevedra. Galicia en Común, á súa vez, está en condicións de revalidar as dúas actas que posúe.
Os conselleiros máis veteranos ou con maior exposición mediática logran a mellor nota
Do primeiro Goberno que formou Feijoo tras acadar a presidencia da Xunta, no 2009, só quedan dous conselleiros en activo. Son o vicepresidente primeiro e responsable de Presidencia, Alfonso Rueda, e a responsable de Mar, Rosa Quintana. Os dous máis veteranos sitúanse tamén entre os máis coñecidos e mellor valorados polos cidadáns, aínda que entre ambos se coloca un novato, Julio García Comesaña, titular de Sanidade, que tivo unha maior exposición pública pola xestión da pandemia. Salvando a estes tres, o nivel de relevancia do resto do Consello da Xunta é moi discreto.
O barómetro de Sondaxe aínda non recolle a valoración de Miguel Corgos, nomeado conselleiro de Facenda o pasado luns en substitución do falecido Valeriano Martínez. A enquisa reflexa que todos os membros do Executivo superan o limiar do aprobado. A excepción é María Jesús Lorenzana, responsable de Emprego (área moi castigada pola crise), que queda ás portas, cunha nota de 4,94.
Rosa Quintana é a que obtén a mellor puntuación, un 5,50 sobre 10, aínda que Comesaña písalle os talóns, cun 5,45. Rueda (5,44) sitúase terceiro, pero co grao de coñecemento máis elevado. A listaxe complétana, de maior a menor, José González, de Medio Rural (nota de 5,33); Francisco Conde, en Economía (5,30); Ángeles Vázquez, no medio Ambiente (5,26); Román Rodríguez, en Educación (5,24); Ethel Vázquez, Infraestruturas (5,13) e Fabiola García, Política Social (5,04).
FICHA TÉCNICA
Ámbito: Galicia. Poboación empadroada en Galicia de 18 ó máis anos de idade. Mostra: 1.223 entrevistas. Tipo de entrevista:Técnica mixta; telefónica asistida por computador (sistema CATI) e autoadministrada online (sistema CAWI). Afijación da mostra: Proporcional segundo provincia e tamaño de hábitat do municipio de residencia. Selección de entrevistas: Para o campo telefónico, selección dos fogares mediante semente de aleatorización dunha base de teléfonos dos municipios; para o campo persoal sistema de rutas aleatorias nos municipios. Erro de mostraxe: +/- 2,86% cun nivel de confianza do 95,5% (2 sigmas), no caso de máxima indeterminación (p=q=50%) e para resultados globais. Traballo de campo: Do 14 ao 21 de outubro do 2021. Realización: Instituto Sondaxe. 981 167 300; www.sondaxe.com