Feijoo anuncia unha baixada de impostos e que os orzamentos galegos se aprobarán a semana próxima
GALICIA
Asegura que as contas incluirán unha subida do gasto social
12 oct 2021 . Actualizado ás 17:15 h.O presidente da Xunta de Galicia, Alberto Núñez Feijoo, avanzou que os orzamentos autonómicos se aprobarán a próxima semana. Anunciarao oficialmente no debate de política xeral que comezará este mércores no Parlamento, pero xa o adiantou na súa conta de Twitter este 12 de outubro. Tamén avisou de que porá en marcha unha baixada de impostos.
Feijoo, que este ano non participou nos actos oficiais do Día da Hispanidade que se celebran en Madrid, quixo mostrar no seu perfil da rede social como prepara o debate que afrontará en menos de 24 horas. Xunto a unha imaxe súa repasando papeis e textos para a súa intervención, o líder do PPdeG comentou que na cita parlamentaria presentará o novo Plan Estratéxico 2021-2030, pero tamén que a próxima semana se dará luz verde aos orzamentos galegos, «que xa tiña ultimados Valeriano Martínez», engadiu, lembrando o importante papel que na elaboración das contas tivo o recentemente falecido conselleiro de Facenda. Esas contas, asegurou, incluirán unha subida do gasto social.
Tamén anunciou unha próxima baixada de impostos, ao sinalar que no debate falará de política fiscal. «Galicia leva anos baixando os impostos aos cidadáns e rexeitamos de plano a suba fiscal anunciada polo Goberno central. Fronte a iso, en 2022 a Xunta volverá a baixar os impostos aos galegos», expresou nun dos seus chíos.
Dentro dos contidos que levará ao debate do estado da autonomía, Feijoo tamén indicou que falará sobre «melloras na sanidade, nas residencias de maiores e na educación» e que abordará cuestións como a crise industrial e as medidas para manter o emprego, ou as oportunidades que supoñen para Galicia os fondos europeos Next Generation.
Pontón tamén prepara o debate
Tamén Ana Pontón, que este mércores se estreará como líder da oposición nun debate de política xeral, utilizou a súa conta de Twitter para mostrar como utilizou o día festivo para preparar a súa intervención. Xunto a unha foto súa repasando as notas para o seu discurso, explicou que falará das «consecuencias» das políticas de Feijoo e os doce anos de gobernos do PPdeG, e que achegará as propostas do BNG «para unha nova Galiza».
Nese sentido, a portavoz nacional do Bloque destacou tres retos: «Superar a crise, reforzar vos servizo públicos e autogoberno político e financeiro real».