O fiscal mantén a petición de sete anos de cárcere para o Pequeno Nicolás pola súa farsa en Ribadeo
GALICIA
O xuízo, que se celebrou na Audiencia Provincial de Madrid, quedou visto para sentenza
14 may 2021 . Actualizado ás 21:45 h.A farsa que Francisco Nicolás Gómez Iglesias , o Pequeno Nicolás, protagonizou no verán do 2014 en Ribadeo para supostamente tratar de impresionar e enganar ao presidente de Alsa , Jorge Cosmen, quedou onte vista para sentenza na Audiencia Provincial de Madrid. Por mor deste episodio, tirando do fío fóronse coñecendo as andanzas dun mozo que gañou unha inaudita popularidade e que agora se ve ás portas do cárcere.
Tras as declaracións onte das últimas testemuñas, finalmente a fiscalía decidiu manter a súa petición de que sexa condenado a sete anos de prisión por, presuntamente, facerse pasar por unha ligazón entre Vicepresidencia do Goberno e a Casa Real, cunha elaborada posta en escena á súa chegada ao porto de Ribadeo e despois nun restaurante.
O Pequeno Nicolás está acusado os delitos de usurpación de funcións públicas, falsidade en documento oficial e suborno pasivo. A acusación popular, exercida pola Asociación Municipal Unificada de Madrid, tamén mantivo a súa petición inicial de 11 anos de cárcere.
Onte tomouse declaración en calidade de testemuñas a varios ribadenses que tiveron relación co caso. O primeiro en testificar foi o alcalde de Ribadeo, Fernando Suárez Barcia, quen manifestou que uns días antes da comida do Pequeno Nicolás con Jorge Cosmen o xefe da policía local informoulle de que alguén da Casa Real ía vir a Ribadeo. Dicía que querían pasar desapercibidos -todo o contrario do que ocorreu, pois apareceron con dispositivos luminosos nos coches- e solicitaban escolta. O rexedor accedeu a iso. Chegado o día, Suárez achegouse ao restaurante e entregoulle ao Pequeno Nicolás un obsequio, unha lámina da praia das Catedrais sen valor económico.
Despois declarou o xefe da Policía Local de Ribadeo, quen manifestou que soubo do encontro por varias chamadas telefónicas de persoas que se identificaron como «unha comitiva que ía en representación de Presidencia do Goberno e a Casa Real». Máis en concreto, apuntou que nalgunhas ocasións falou «con Nicolás» e noutras o interlocutor presentouse como o xefe de escolta. O que lle pediron foi, precisamente, que os escoltasen desde a entrada de Ribadeo, como en efecto se fixo.
A continuación declararon o entón presidente do Real Club Náutico de Ribadeo e o responsable de restaurante San Miguel. Tamén testificou un redactor de La Voz de Galicia, quen confirmou ter recibido varias chamadas do Pequeno Nicolás solicitándolle que se retirase a información na web que falaba da comida en Ribadeo, co argumento de que se trataba dunha cuestión de seguridade nacional, o que non se fixo ao non considerarse crible.
Ademais, psiquiatras forenses dos xulgados de Madrid ratificaron o informe que elaboraron no 2018 para outra causa, na que Gómez Iglesias foi absolto dun delito de calumnias contra o CNI no 2016, no que se concluía que o Pequeno Nicolás padece un trastorno de personalidade «con trazos narcisistas» e inmadurez desde a súa adolescencia, que naquel momento afectaba de forma moderada á súa capacidade cognitiva. Indicaron que, ao seu entender, a «ampliación de poder» que o Pequeno Nicolás aduciu na súa declaración na primeira xornada do xuízo como xustificación da súa viaxe a Ribadeo é compatible coas características do trastorno que sofre.
